«Яшил қутқариш» чоп этган баёнотида айтилишича, Кок-Жайляу табиий маскани ҳамон «тоғ-чанғи курорти қуриш ва қарор топиши учун Олмаота шаҳрининг Медеу туманидаги заҳира ерлар тоифаси» га мансуб. Экофаоллар бу шаҳар ҳокимиятига табиий маскан ҳудудидан ўз билганича фойдаланишга имкон беришини таъкидламоқдалар.
Ўз баёнотида «Яшил қутқариш» 2014 йили ҳукумат томонидан Кок Жайляу максанини алоҳида қўриқланадиган ҳудудлар ерлар таркибидан чиқариш тўғрисида қабул қилинган қарорини, шунингдек, “табиий ҳудуд борасидаги бошқа барча қарорларини” бекор қилишга чақиради. Фаоллар ҳаммадан кўра мазкур масканда бунёд этилган қурилишларни бузишга, автотранспортлар ҳаракатини таъқиқлашга ва тупроқ қатламини қайтадан культивация қилишга даъват этмоқда.
Март ойида деярли 30 йилдан мамлакатни бошқарган Нурсултон Назарбоев ўрнига келган президент Қосим-Жомарт Токаев октябрь ойи сўнггида Олмаотага амалга оширган ишчи ташрифи чоғида Олмаота яқинидаги тоғлардаги Кок Жайляу табиий масканида 16 йилдан бери баҳс олиб борилаётган тоғ-чанғи курорти қурилиши лойиҳаси билан шуғулланишни таъқиқлашини айтди. «Ҳар сафар бу масалага қайтмаслик учун мен бугун ушбу лойиҳа билан шуғулланишни таъқиқлайман. Яъни, Кок-Жайляуда тоғ-чанғи сиҳатгоҳи қурилишини. Бизга у керак эмас», — дея Токаевдан иқтибос келтиради маҳаллий ОАВ.
Айрим журналист ва фаоллар “ушбу масалада нуқта қўйилган” деб ҳисоблашарди. «Яшил қутқариш» ўз баёнотида давлат раҳбарининг бу баёнотини олқишлашини айтди, “бироқ унинг амалга оширилиши учун қатор аниқ чораларни қабул қилиш керак”. «Яшил қутқариш» га кўра, табиий масканни ва бутун Иле-Алатау миллий паркини сақлаб қолиш йўлида муҳим қадам ташланди, бироқ масаланинг якуний ечимигача анча қовун пишиғи бор».
«Юқорида қайд этилган барча чораларни амалга ошириб бўлингандагина, тоғ-чанғи курорти қурилиши тўхтатилди ва табиатга етказилган зарар қисман қопланди, дейиш мумкин», — дер экан, экологик жамият мазкур масалаларга аниқлик киритиш учун давлат органларига хат йўллаганини хабар қилди.