Видеотасвирда атрофи янги қурилаëтган кўп қаватли бинолар билан ўралган майдонда юзлаб одамнинг кичик гуруҳга ташлангани¸ бино ичкарисига уларни қувлаб киргани кўрилади.
Видеони суратга олган шахснинг “турклар тамом бўлди” деганидан жанжалнинг мазкур қурилишда ишлаëтган турк ва маҳаллий ўзбеклар ўртасида чиққани англашилади.
Бу жанжал ҳақида маълумот юборган самарқандликлардан яна бири¸ сон жиҳатдан кўп бўлган ўзбекларнинг туркияликларни калтаклаганини билдирди.
Жароҳатланган ва ҳибсга олинганлар ҳақида аниқ маълумот йўқ.
Манбалар Туркия элчисининг воқеадан бир неча соат ўтиб-ўтмай Самарқандга “вазирлардан бири ҳамроҳлигида” етиб келганини хабар қилди.
Agromir Buildings қурилиш ҳудудида жанжал юзага чиққанини хабар қилган самарқандликлардан бири ўзини мазкур ширкат ишчиси деб таништирди.
“Мен ишга кечроқ келсам¸ бутун объект ИИБ ва Миллий гвардия томонидан ўраб олинган экан. Ҳеч кимни киритишмади¸ бугун иш бўлмади. Билсам¸ катта жанжал чиқиб¸ ўзбек ишчилар қурилишда ишлаëтган туркияликларни урипти. Ўлганлар йўқдирку¸ лекин қаттиқ яраланганлар бор”¸ деди воқеага бевосита гувоҳ бўлмаганини таъкидлаган самарқандлик ишчи.
Бу суҳбатдош тахминича¸ Мотрид объектида камида 1500 дан ошиқ одам ишлаган.
Видеода катта қурилиш майдонида юзага чиққан жанжал эпизоди акс этган. Унда юзлаб одам тўпланиб турган катта майдоннинг бир чеккасида жанжал бошлангани¸ сўнгра бир гуруҳ одамнинг қаршидаги битмаган бино подъездига қараб қочгани¸ бошқаларнинг уларни қувлаб ортидан киргани кўрилади.
Воқеани юқори қаватдаги деразадан тасвирга олган қурувчилардан бири тожик тилида “турклар тамом бўлди” деганидан¸ қочганларнинг турк ишчилари экани англашилади.
Самарқандликлардан яна бири¸ 6 ноябрь кунги жанжалнинг турк ва маҳаллий ишчилар ўртасида чиққанини билдирди.
Бу суҳбатдош¸ тонгда бошланган тўполоннинг соат 3 ларга бориб тинчитилгани¸ жароҳат олганлар сонининг анча катта эканини қўшимча қилди.
Самарқандликлар жанжал бошланиши ҳақида икки тахмин тарқаганини билдирди.
“Биринчиси¸ гўë турк ишчилари ошхонада ишлайдиган маҳаллий аëлни зўрлаган ва жанжал шундан бошланган. Иккинчи тахмин¸ жанжал маҳаллий ишчиларнинг ўзлари ва туркларга айни иш учун берилаëтган ойлигидаги катта фарқдан келиб чиққан. Менимча¸ иккинчиси ҳақиқатга яқин. Agromir Buildings туркиялик ишчиларга 1000 доллар ойлик берса¸ ўзбекларга 100 доллар бераяпти. Бугунги жанжалга ана шу адолатсизлик бевосита ëки билвосита сабаб бўлган”¸ деди воқеа тафсилотларидан билвосита хабардор самарқандлик ишчи.
Манбалар жанжал тугар-тугамас Туркиянинг Ўзбекистондаги элчиси Самарқандга етиб келганини маълум қилди.
“Тошкентдан қайсидир вазир ҳамроҳлигида келди¸ кимлигини аниқ айта олмайман. Бу воқеа ҳақидаги хабар чиқиб кетмаслиги учун ҳаммани қаттиқ қўрқитишди¸ атрофни ўраб¸ сурат ва видеолар тарқамаслиги учун роса ҳаракат қилишаяпти”¸ деди самарқандлик ишчилардан бири.
Самарқанд вилояти ички ишлар бошқармасининг маълумотига кўра жорий йилнинг 6 ноябрь куни Самарқанд шаҳар, Қора-сув массиви, Обод Маскан маҳалласи ҳудудида “Агромир Билдинг” корхонаси томонидан қурилаётган кўп қаватли уйларнинг қурилиш майдонида қурилиш-монтаж ишларини олиб бораётган ўн нафар ишчилар ўртасида ўзаро келишмовчилик оқибатида жанжал келиб чиққан.
Мазкур ҳолат оқибатида тўрт нафар фуқаро Республика шошилинч тез ёрдам илмий маркази Самарқанд филиалига турли тан жароҳатлари билан мурожаат қилишган.
Хозирги кунда ушбу ҳолат юзасидан Самарқанд шаҳар ИИБ томонидан Ўзбекистон Республикаси Жиноят кодексининг 277 моддаси 2 қисми “б” банди билан (бир гуруҳ шахслар томонидан содир этилган безорилик) жиноят иши қўзғатилиб, терговолди ҳаракатлар олиб борилмоқда.