14 ноябрь куни Бразилия пойтахтида БРИКС саммитидан кейин россиялик журналистларнинг саволларига жавоб берар экан, Путин, «ҳозир [Зеленский билан] “норманд формат”ига қадар учрашиш ҳақида гап бормаяпти, чунки биз “норманд формат”ида учрашишга келишиб олганмиз», деди. Унинг сўзларига қараганда, “норманд формат”идан бошқа механизм йўқ”.
Қозоғистон собиқ президенти Нурсултон Назарбоев Нур-Султон шаҳрида 12 ноябрь куни бўлиб ўтган анжуманда Россия президенти Владимир Путин ва Украина президенти Владимир Зеленский ўртасида тўғридан тўғри учрашув ўтказиш ташаббуси билан чиқди. Назарбоевнинг баёнотига қараганда, Зеленский шу каби учрашувда иштирок этишга розилигини билдирган. Путиннинг матбуот котиби Дмитрий Песков ўша куни Назарбоевнинг ташаббусига изоҳ берар экан, Россия етакчиси «учрашув учун ўтказиладиган учрашув кам самара бериши»ни айтишини таъкидлади.
«Агар биз шундоқ ҳам учрашмоқчи бўлсак, у ҳолда нима учун тайёргарликсиз ўтказиладиган учрашувга шошишимиз керак? Менинг фикримча, бундан ҳеч ким: мен ҳам, президент Зеленский ҳам манфаат кўрмайди», – деди журналистларга 14 ноябрь куни президент Путин. Унинг гапларининг стенограммаси Кремль сайтида эълон қилинди.
12 ноябрь куни Украина ташқи ишлар вазири Вадим Пристайко Би-би-сининг украин хизматига берган интервьюсида Қозоғистонда Украина президенти Владимир Зеленскийнинг Россия президенти Владимир Путин билан учрашиши ҳақидаги хабарларни инкор қилди.
«Амалда “норманд формат”и ва “норманд формат”идаги учрашувлар мумкин. Умуман, “норманд формат”идан бошқа механизм йўқ. Шу сабабли биз –“биз” деганда Россияни назарда тутаяпман, яъни мен ва ҳамкасбларим, ТИВ, бизнинг тегишли идораларимиз – бу форматни сақланиб қолиш тарафдоримиз. Яна бир бор такрорлайман: бошқача бўлиши керак эмас ва бўлмайди ҳам», – деди Путин.
Сўнгги бор Украина шарқидаги можароларни тинч йўл билан барқарорлаштиришни кўзловчи «норманд формати» деб аталувчи тўрт томонлама музокаралар 2016 йил октябрида бўлиб ўтган эди.