Тўпланганлар учта асосий талабни илгари сурдилар: биринчиси - Райимбек Матраимовни ушлаш, иккинчиси – ҳамма ўғриларни қамоққа ташлаш ва ниҳоят учинчиси – ҳақиқий ислоҳотлар ўтказиш. Давлат гимни ижро этилганидан ва шиорлар илгари сурилганидан сўнг ташкилотчилар имзо тўплашга киришиб кетдилар ва акция тугашини айтишди.
«Биз талабларимиз ҳукумат ва президентга юборилиши учун имзо тўпламоқдамиз. Бу акция биринчи қўнғироқ бўлиб, биз ҳафта охиригача ҳукуматдан муносабат кутамиз», - деди фуқаролар фаоли Улан Усойун.
Коррупцияга қарши тинч акция ўтказилган жойга ИИВ вакиллари келди. Ўзини Биринчи май туман милиция бошлиғи дея таништирган Ақилбек Азакеев митинг ташкилтчиларига суднинг митинглар ўтказилиши тақиқланиши тўғрисидаги қарорини кўрсатди. «Суд томонидан13 ноябрдан бошлаб футбол мусобақалари ва ОДКБ мажлиси ҳамда Қозоғистон президентининг ташрифи муносабати билан ҳар қандай митинг ўтказиш тақиқланди», -деди Азакеев.
Бироқ акцияда иштирок этган юристлар суд қарорини ўрганиб чиққанларини ва бу қарор аниқ бир акцияга - яъни 13 ноябрда ўтиши керак бўлган тадбирга қаратилганини айтишди. Шундан сўнг милиция ходимлари кетишди, улар журналистларга берган интервьюларида акция ноқонуний эканини айтишди. Шу билан бирга қандай чора кўришларини ойдинлаштирмадилар.
«Азаттық» радиоси коррупция ва уюшган жиноятчиликни тадқиқ қилиш Маркази (OCCRP) ва Kloop.kg сайти билан ҳамкорликда ўз суриштирувларининг иккинчи қисмини чиқарди, унда Қирғизистондан камида 700 млн доллар олиб чиқиб кетилгани таъкидланади. 10 ноябрь куни Истамбулда журналистик суриштирув фигурантларидан бири – келиб чиқиши уйғур бўлмиш хитойлик бизнесмен Айэркен Саймаити ўлдирилди. У журналистларга фирибгарликка Давлат божхона хизмати раҳбарининг собиқ ўринбосари Райимбек Матраимовнинг оиласи аралашиб қолганини айтган эди.
ҚР парламентининг депутати Искендер Матраимов акаси Райимбек Матраимов божхонадаги коррупцияга алоқадорлиги борасидаги хабарларни инкор қилди, унинг таъкидлашича, «журналистлар жиноятда гумон қилинганлардан олинган маълумотларга таянишган».