Ссылки доступа

Тожикистонда умрага йўл олган 30 га яқин диндор рейсдан туширилди


Душанбе халқаро аэропортида Маккага йўл олиб, умра(кичик ҳаж)га зиёратини бажармоқчи бўлган фуқаролар самолёт бортидан туширилди.

Ҳисорда яшовчи 63-ёшли Марҳабо Давлатова Саудия Арабистонига учиб кетмоқчи бўлган 16 кишилик гуруҳ таркибида эди, аммо гуруҳнинг барча аъзолари самолёт бортидан туширилди. «Йўлбошчимиз ушланганида биз парвозни кутаётган эдик. Бизга у лицензияга эга бўлмасада диндорларни умрага юбориш билан шуғулланганини айтишди. Мен умра зиёратини тўрт йил кутдим ва ҳозир чуқур ташвишдаман», - дейди Марҳабо Давлатова.

Унинг сўзларига қараганда, ўзи ва яна икки қариндоши августдаёқ ҳужжатларни расмийлаштиришган ва пулларни тўлаб қўйишган. «Ҳукумат вакиллари аэропортда бизга пуллар қайтарилишини айтишди. Бироқ мен гап пулда эмаслигини айтдим, барчамизни қамраб олган тушкунликдан қандай қилиб чиқиб кетишимиз мумкин?»

Расмийлар умумий ҳисобда 30 нафар фуқаронинг кичик ҳажга боришларига рухсат беришмади – уларнинг ҳаммаси "Сомон Эйр” ва "FlyDubai”авиакомпанияларининг Душанбе – Дубай рейсидан туширилди.

Тожикистон ҳукумати қошидаги миллий анъана, тантана ва урф-одатларни тартибга солиш ва диний Қўмита матбуот котиби Афшин Муқимнинг айтишича, йўлбошчиларнинг кичик ҳажни ташкил қилишлари учун рухсатномаси бўлмаган, улар давлатга солиқ тўлашмаган. «Бу йўлбошчилар авваллари ҳам диндорларни умрага олиб боришган ва уларни хайрия бошпаналарига жойлаштиришган», - дея қўшимча қилади матбуот котиби.

Ўз номини ошкор қилишни истамаган йўлбошчилардан бири Радио Озоди билан суҳбатда солиқ тўламаганини ва айрим талабларга итоат қилмаганини тан олди. Унинг айтишича йўлбошчилардан ҳеч ким ҳибсга олинмаган.

Расмийлар Маккага бора олмаган зиёратчиларни расмий рухсатномага эга бўлган компаниялар орқали Умрага юборишга ваъда беришди. Лицензияга атиги иккита – «Ормон» ва«Расул» сайёҳлик компаниялари эга. Бошқа компанияларнинг хукуматдан рухсат олишга бўлган уриниши самарасиз якунланди.

Хусусий йўлбошчилар томонидан умрага бориб келган диндорларнинг айтишларича, кичик Ҳажни амалга ошириш учун атиги 17 минг сомони ($1700дан кўпроқ) тўлашган. «Расмий» компанияларнинг хизмати 20 минг сомонидан кўпроқ туради, дея таъкидладилар.

Ҳаж сингари Умра ҳам мусулмонлар учун бажарилиши керак бўлган амаллардан биридир. Бироқ Ҳаждан фарқли равишда Умра йилнинг исталган вақтида бажарилиши мумкин. Ҳаж исломнинг бешта фарзидан биридир. Ислом шариатига биноан қурби етган ҳар бир мўмин-мусулмон ҳаёти давомида бир марта бўлса-да Ҳаж қилиши керак.

Эслатиб ўтамиз, 2019 йилда 5 минга яқин тожикистонлик Ҳажга борди, ўтган йили уларнинг сони 6 мингдан кўп эди. Бу йил Ҳажга бориш ҳаражатлари 35 минг 128 сомони ($3,5 мингдан кўпроқ)ни ташкил қилди. Умрага бориб келган фуқаролар сони аниқ эмас.

XS
SM
MD
LG