Мигрантларнинг айтишича, Вахдатда туғилган 29 ёшли Маҳмуд Абдураҳмонов Санкт-Петербургдаги агентлар орқали 400 га яқин сохта авиачипта сотган.
Мигрантларга чипта сотган агентлар алданган харидорлар эндиликда чипталар пулини қайтаришни талаб қилишаётганини айтишмоқда. Уларнинг сўзларига қараганда, Абдураҳмоновнинг ўзи 5 декабрдан бери изсиз йўқолган. Агентларнинг таъкидлашича, Абдураҳмоновнинг телефонидаги автожавоб берувчи сўнги бор турк ва инглиз тилида жавоб қайтарган.
Тожикистонда яшовчи Азизулло Исматзода юртига 15 декабрь куни қайтишни режалаштирган ва Абдураҳмонов агентидан 15 минг рублга чипта сотиб олган. Радио Озоди билан суҳбатда алданган йўловчининг айтишича, чипта харид қилаётганида агентлар унга парвоздан уч кун аввал электрон чипта юборишга ваъда беришган.
«Бироқ кейинроқ биз чипталар сохта эканини, ўша куни Санкт-Петербургдан Душанбега самолёт парвози йўқлигини билдик», - дейди суҳбатдош. Унинг айтишича, чиптанинг нархи расмий авиакассаларга қараганда 4-5 минг рублга арзон эди: аэропорт кассаларида чипталар нархи 20-21 минг рубл туради, Абдураҳмонов эса уларни 15-16 минг рублдан сотган, бу ўз навбатида пулларни тежамоқчи бўлган харидор-мигрантлар сонини оширган.
Алданган харидорларнинг сўзларига қараганда, у асосан «Сомон Эйр» ва «Уральские авиалинии» авиакомпаниялари самолётларига чипта сотган.
Хуқуқ-тартибот ва суд идораларида ҳозирча Абдураҳмоновнинг сохта чипталар сотувига алоқадорлиги фактини тасдиқламади.
Агентлардан бири Аҳлиддин Абдуллоев Абдураҳмоновнинг ҳатти –ҳаракатлари туфайли 700 минг рублдан кўпроқ зарар кўрди. Унинг айтишича, Абдураҳмонов билан шу йилнинг август ойидан бери таниш, ўшанда у арзон чипта таклиф қилган эди. «Шахсан ўзим ёзда ундан арзон чипта харид қилдим ва Тожикистонга парвоз қилдим. Бир нечта қариндошларимга ҳам ундан чипта сотиб олганман. Ҳаммаси яхши эди. Шу тариқа у ишончга кириб олди, ҳамда агент бўлишимни ва чипта сотишимни таклиф қилди», - дейди суҳбатдош.
Шу тариқа у юзлаб чипталарни сотган, кейинчалик уларнинг ҳаммаси сохта бўлиб чиқди. Энди эса алданган йўловчилар ўз пулларини қайтаришни талаб қилмоқда. Абдуллоевдан ташқари яна 7 агент фирибгарликнинг жабрдийдасига айланиб қолганликларидан нолишмоқда. Улардан бирининг айтишича, 2 млн рубл зиён кўрибди.
Алданган фуқаролар Санкт-Петербург полицияси ва бу шаҳардаги Тожикистоннинг Бош консуллигига ариза билан шикоят қилдилар. Расмийлар аризаларни кўриб чиқаётганликларини айтишди.
Тожикистоннинг Санкт-Петербургдаги бош консуллиги ходими Фаррух Қосимовнинг Радио Озоди билан суҳбатда айтишича, «бу масала назоратга олинган ва хуқуқ-тартибот идоралари билан ҳамкорлик қилинмоқда».