АҚШ фуқароларига оломондан ажралмаган ҳолда юриш ва ўз атрофидаги вазиятга эътиборлироқ бўлиш тавсияси берилди.
Америка элчихонасининг огоҳлик даъвати Инқилобий гвардия таркибидаги илғор қўшинларга қўмондонлик қилган нуфузли эронлик генерал Қосим Сулаймонийнинг Америка зарбаси оқибатида ўлдирилганидан кейин Яқин Шарқдаги вазият кескинлашиши ортидан янгради. Бу ўтган жума куни эрта тонгда Қосим Сулаймоний ичида бўлган самолёт Бағдодга келиб қўнганидан сўнг кўп ўтмай рўй берди. Эрон генерал Сулаймонийнинг ўлдирилиши учун АҚШдан ўч олишга ваъда берди.
Шанба куни Оқ Уй АҚШ Яқин Шарққа 82-ҳарбий десант дивизия таркибидаги 3 минг аскарни жўнатишини эълон қилди. Reutersнинг Пентагонга таяниб хабар беришича, бу қарор АҚШ шаънига таҳдидлар кўпайиб бораётган бир пайтда эҳтиёт чораси сифатида қабул қилинган. Қўшинлар шу ҳафта бошидан 750 нафар америкалик ҳарбий хизматчи етиб келган Кувайтда жойлаштирилади.
Айни пайтда АҚШ президенти Дональд Трампнинг Твитттерда айтишича, агар Теҳрон эронлик генерал Қосим Сулаймонийнинг ўлдирилиши учун америкаликларга ҳужум қилса, АҚШ “Эрон ва унинг маданияти учун ўта аҳамиятли ва муҳим ҳисобланган” Эрондаги 52 та нишон бўйича “жуда тез ва жуда кучли” зарбалар беришга тайёр.
Эрондаги энг нуфузли амалдорлардан бири – Эрон ислом инқилоби қўриқчилари корпусининг илғор бўлинмаси қўмондони, генерал–майор Қосим Сулаймонийнинг ўлими ҳақидаги хабар 3 январга ўтар кечаси маълум бўлди. У АҚШнинг махсус операцияси чоғида Ироқнинг Бағдод халқаро аэропорти яқинида ўлдирилди: операция президент Трампнинг шахсий буйруғига кўра тайёрланган.
Шундан кейиноқ Вашингтон элчихона фаолиятини тўхтатиш тўғрисида баёнот берди, унинг ходимларини эвакуация қилди, Американинг барча фуқароларини Ироқни тарк этишга чақирди. Пентагон эса ҳарбийлар эронлик генерални махв этиш операциясини айнан Доналд Трамп буйруғига кўра бошлаганликларини тасдиқлашди.