Россия Конституциявий суди Владимир Путин қайта сайланишига йўл очувчи ўзгаришларни кўриб чиқиш учун 14 мартда навбатдан ташқари йиғин ўтказган, ўша куни Путиннинг ўзи конституцияга ўзгартиш киритиш бўйича қонунни имзолаган эди.
Апрель ойида конституцияни ўзгартириш бўйича Россия бўйлаб референдум ўтказиш режалаштирилмоқда.
Жорий йилнинг январида Путин ҳокимиятни президентдан парламентга ўтказиб беришни кўзловчи ислоҳотларни таклиф қилган эди.
Аммо ҳафта бошида Россияни 20 йилдан бери бошқариб келаётган Путин Россия давлат думасида чиқиш қилиб, президентга уч марта ва ундан кўп сайланишни ман этувчи қонунни бекор қилишни қўллашини изҳор қилди.
Ҳозирги конституцияга кўра, Путин давлат раҳбари сифатида ваколати тугайдиган 2024 йилда президентлик лавозимига ўз номзодини кўрсата олмайди.
Ўзгаришлар киритилганидан кейин у 2024 йилда ва 2030 йилда қайта президентликка номзодлигини кўрсата олади. Бугунга қадар Путин ўз номзодлигини кўрсатиш-кўрсатмаслигини очиқ изҳор қилгани йўқ.
Таклиф қилинаётган ўзгаришлар орасида президент ваколатларини янада ошириш ҳамда Россия қонунларининг халқаро қонунлардан устуворлигини таъминлаш каби таклифлар бор.
Шунингдек, таклиф қилинаётган ўзгаришлар орасида фақат эркаклар ва аёллар ўртасида никоҳ ўқитиш ҳамда худога ишончни Россиянинг «анъанавий қадриятлари» ўлароқ кўрсатиш таклифлари бор.
Бугунга қадар конституцияни ўзгартиришни Россиянинг барча вилоятлари парламентлари ҳамда Россия парламентининг ҳар икки палатаси қўллаб чиқди.