Бұл туралы бүгін өткен үкімет отырысында қаржы нарығын дамыту және реттеу агентігінің төрайымы Мәдина Әбілқасымова хабарлады. Үкімет отырысы онлайн-режимде өтті.
Әбілқасымованың сөзіне қарағанда, бұл норманы жеке және заңды тұлғаларға қарыз берген банктер мен микроқаржы ұйымдарының (ломбардтар, кредит серіктестіктері, тб) барлығы орындауы тиіс.
Агенттік төрайымының баяндамасы бойынша «Қазақстан Республикасындағы банктер мен банк ісі туралы» заңның 34 бабы 3 тармағы және «Микроқаржы ісі туралы» заңның 3 бабының 6 тармағына сәйкес банктер мен микроқаржы ұйымдары төтенше жағдайға байланысты қаржы жағдайы нашарлаған жеке кәсіпкерлер мен шағын және орта бизнес субъектілеріне төлем мерзімін ұзарту жөнінде жұмыс жүргізуі керек».
Үкімет отырысында бұл жеңілдік төтенше жағдайға байланысты беріліп отырғаны айтылды. Сонымен бірге елдің ұлттық экономика министрі Руслан Даленов кәсіпкерлерді қолдауға кемінде 300 млрд теңге бөлінетінін (688 млн доллар), басым жобаларды жеңлдікпен несиелендіруге арналған үкіметтік бағдарламаларға 400 млрд теңге көлемінде қаржы бөлінетінін жеткізді.
Президент Қасым - Жомарт Тоқаев Дүниежүзілік денсаулық сақтау ұйымының жаңа COVID-19 коронавирусын пандемия деп жариялауына байланысты Қазақстанның барлық аумағына 2020 жылдың 16 наурыз сағат 8.00-ден бастап, 2020 жылдың 15 сәуір сағат 7.00-ге дейін төтенше жағдай енгізген.