Ссылки доступа

Эмомали Рахмон: 40тан ашык тажик окумуштуусу плагиаттык кылган


Тажикстандын президенти Эмомали Рахмон

Тажикстандын президенти Эмомали Рахмон өлкөдөгү 40тан ашык окумуштуу «Диссернет» порталы тарабынан плагиаттыкка айыпталганына нааразылыгын билдирди.

«Айрым тажик изденүүчүлөрү чет өлкөлүк окумуштуулардын илимий эмгектерин кеңири колдонуп, жеңил жолду тандап алышканы анык болду. Бул илимий жетекчилеринин шалаакылыгы, изденүүчүлөрдүн даярсыздыгынан болуп жатат. Акыркы жылдары жетекчи кызматтардагы адамдар ишмердүүлүгүнө байланышпаган адистиктер боюнча диссертацияларды жактап, илимий даражаларды алган учурлар көбөйүп жатат», - деди Рахмон.

Президент мындай жетекчилер алгач кызматтан кеткендиги тууралуу арыз жазып, андан кийин гана илимий ишмердүүлүк менен алектениши керектигин белгиледи.

2018-жылы жазында «Диссернет» порталы Тажикстандагы аткаминерлердин, ишкана жетекчилеринин жана педагогдордун илимий эмгектерине анализ жүргүзүп, аларды плагиаттыкка айыптаган.

Алардын арасында жакында эле Тажикстан Улуттук университетинин ректору болуп дайындалган Кобилжон Хушвахтзода, өлкөнүн билим берүү министринин жаңы орун басары Нурали Собирзода жана Тажикстан президентине караштуу Билим берүү тармагын көзөмөлдөө боюнча агенттиктин жаңы директору Шохин Саидзода болгон. Мындан тышкары жакында эле вице-премьер кызматына дайындалган Давлатшо Гулмахмадзода да плагиаттыкка айыпталган.

Видео

XS
SM
MD
LG