Бишкекда АҚШ долларининг курси бирданига кўтарилди. Valuta.kg сервисининг хабар қилишича, пойтахтдаги айирбошлаш бюроларида сўнгги икки соат ичида доллар ўртача 81 сомдан сотилди. Шу билан бирга мамлакатдаги йирик банклар курсни 84.9-85 сом деб белгилади. Ижтимоий тармоқ фойдаланувчиларининг таъкидлашларича, кўплаб «айирбошлаш бюроларида» долларлар тугаб қолди.
Миллий банк томонидан 20 март учун белгиланган АҚШ долларининг курси 72,9 сомни ташкил қилади.
Сўнгги бор долларнинг курси бирданига 10 март куни ошган эди, ўшанда Америка валютаси ўртача 69.8 сомдан 72-73 сомгача кўтарилган эди. Миллий банк ўша куни валюта интервенциясини амалга оширган, яъни ички бозорда 53,7 млн доллар сотган эди. Миллий банк раҳбари Толкунбек Абдигуловнинг айтишича, «бундан кейин сом қадрининг тушиши учун сабаб йўқ, Қирғизистон иқтисодиёти ўсмоқда, айрим тузилмавий ўзгаришлар эса коронавирус билан боғлиқ бўлиб қисқа муддатли таъсирга эга».
Миллий банк доллар курси ўсишини тўхтатиш мақсадида 19 март куни кечқурун 3,7 миллион долларлик интервенцияни амалга оширди. Бир кунда Америка валютаси 73 сомдан 85 сомгача қимматлади. Айирбошлаш бюроларида «Азаттиқ» томонидан ўтказилган сўровга берилган жавобда нақд доллар қолмагани билдирилган.
Қирғизистон Миллий банки доллар курси бирданига ўсиб кетмаслиги учун интервенция қилади. Қачонки доллар курси бирданига ўсадиган бўлса, валюта таклифини таъминлаш мақсадида Миллий банк бозорга долларни чиқаради. Қачонки доллар бирданига тушиб кетадиган бўлса, у ҳолда талабни қондириш мақсадида сотиб олади.