Озодликнинг Ашхободдаги мухбири хабар беришича, 19 март кечки пайтдан бери мамлакат пойтахтига кириш ва чиқишга тўсиқ қўйилди. «Ашхободни кириш ва чиқиш учун ёпишди. Бир жойдан иккинчи жойга ўтиш фақат рухсатнома асосида. Минтақалардан қатнайдиган хусусий машиналар, такси, йўналишли таксилар ва автобуслар шаҳарга киравериш жойидан ортга қайтмоқда. Пойтахт таъминоти учун мўлжалланган маҳсулот ортилган юк транспортларининг ҳаракати ҳам рухсатнома орқалигина амалга оширилиши мумкин», деб хабар беради мухбир.
Озодликнинг минтақалардаги мухбирлари ҳам вилоятлик турғунларнинг Ашхободга бориши ҳам номаълум вақтга ёпилганини хабар беришмоқда.
Лебап вилоятидаги мухбирнинг минтақа администрациясидаги манбага таяниб хабар беришича, пайшанба куни барча вилоятларда шошилинч мажлислар ўтказилган.
«Бугун барча вилоятларда видео алоқа орқали мажлис ўтказилди, унда 20 мартдан бошлаб минтақалар ўртасида йўллар ёпилишини эълон қилишди. Мазкур режим тахминан апрель охиригача амал қилади. Вилоятлар ўртасида ҳаракатланиш учун махсус рухсатномалар олишга тўғри келади. Шунингдек, мактаб таътилларини узайтириш ва болалар боғчаларини карантинга ёпиш масаласи муҳокама қилинмоқда», дея хабар қилади лебаплик мухбир.
Туркманистон расмийлари ҳанузгача мамлакат ичкарисида COVID-19 коронавируси юқиши ҳолатлари қайд этилмаганини иддао қилаётганига қарамай, шундай кескин чоралар кўрилмоқда.
Аммо Озодлик мухбирлари хабардор манбаларга таяниб, икки ҳафта муқаддам коронавирус касаллигининг икки ҳолати ҳақида хабар беришганди. Шу ҳафта бошида эса Туркманистоннинг Эрон билан чегарадош минтақаларида касалликнинг бир неча ҳодисалари ҳақида хабарлар пайдо бўлди.