Ұйым Құрама Штаттар үкіметінен айтқан сөздеріне дәлел келтіретін ешқандай анықтама алмадық дейді.
"Біз Құрама Штаттар үкіметінен көзқарасына дәлел келтіретіндей ешқандай мәлімет алмадық. Сол себептен дәйексіз айтылған дүние деп есептейміз", - деді ДДСҰ-ның төтенше жағдай жөніндегі бағдарлама директоры Майкл Райан. Райан сонымен бірге вирустың қайдан пайда болғаны жөнінде саяси емес, ғылыми зерттеу жүргізуге шақырды.
АҚШ мемлекеттік хатшысы Майк Помпео 3 мамырда вирустың Ухан зертханасынан пайда болғаны жөнінде жеткілікті дәлелдер барын мәлімдеген. Бірақ ол жан-жақты тоқталмады. Кейін Помпео бұл мәлімдемесін ABC каналына берген сұқбатында тағы қайталады.
Қытайдың мемлекеттік CCTV телеканалы 4 мамырда Помпеоның мәлімдемесін "ешқандай шындыққа сәйкес келмейтін ақылсыз әрі екіұшты айтылған" деген пікір білдірді.