Түркіменстан президенті Гурбангұлы Бердымұхамедов 6 мамырда Өзбекстан президенті Шавкат Мирзияевпен телефонмен сөйлескен.
"Президент Гурбангұлы Бердымұхамедов көрші елдің су басқан аймақтарына көмектескісі келетінін айтты" деп хабарлады Түркіменстанның мемлекеттік ақпарат құралдары.
Өзбекстанның Сырдария облысында 1 мамырда Сардоба бөгеті жарылып, жақын маңдағы бірнеше ауылды су басты. Шамамен 70 мың адам басқа жерге көшірілді. Бөгеттен аққан су Қазақстандағы бес ауылды басып қалды.
Ресми мәліметте президенттердің телефонмен әңгімелесуі өзбек тарапының бастамасымен болғаны айтылған, бірақ Өзбекстан президентінің түркімен басшысының ұсынысын қабыл алған-алмағаны белгісіз.
27 сәуірде жойқын дауыл Түркіменстанның бірнеше аймағындағы үйлерді қиратып кетті. Табиғат апатынан бірнеше адам қаза тапқан.
Түркіменстан билігі дауыл туралы мәлімет бермеді, тұрғындарға апат салдары туралы айтуға тыйым салынған.