Маъмурияти вилояти Фарғона то ҳол ин наворҳоро шаҳр надодааст. Вале садои марде, ки сокинонро дар он наворҳо таҳдид мекунад, ба садои раиси ин вилоят монанд аст.
Марде, ки дар наворҳо садояш сабт шудааст, ба зиндонӣ кардани 74 сокини маҳаллӣ ва хат задани "деҳаҳои ҷанҷолӣ" аз харитаи Ӯзбекистон таҳдид карда, мегӯяд, ҷазирақаламрави Сӯхро дар ҳудуди Қирғизистон аз таъминот маҳрум хоҳад кард.
"74 нафарро бо худ ба Фарғона барем, ё не? Агар ин гуна ҳодиса дубора рух диҳад, ман дигар ба инҷо намеоям! Кӣ аз Ленбург (деҳаи ӯзбекӣ дар Сӯх) омадааст? Агар деҳа ҷанҷолӣ аст, бо он дар харита чӣ кор кунем? Аз харитаи Сӯх онро хат зада, таъминотро қатъ хоҳем кард. Магар шумо дар инҷо нишастаед, ки барои мо мушкил эҷод кунед? Мехоҳед, ки 74 ҷавони маҳаллиро зиндонӣ кунем? Сардори мақомоти ҳифзи ҳуқуқ ва додситон рӯйхат омодааст? Хуб, созиш кардем, 74 касро ба зиндон мефиристем", аҳдид мекунад мансабдор.
31 май миёни сокинони деҳаи Чашмаи ҷазирақаламрави Сӯхи Ӯзбекистон ва деҳаи наздимарзии Қирғизистон задухӯрд сурат гирифта, ба иттилои расмӣ, 187 шаҳрванди Ӯзбекистон ва 25 шаҳрванди Қирғизистон захмӣ шуданд.
Дар пайи задухурд сарвазири Ӯзбекистон Абдулло Орипов, раиси Хадамоти амнияти давлатии ин кишвар Абдусалом Азизов ва раиси Фарғона Шуҳрат Ғаниев 1 июн ба маҳалли ҳодиса рафтанд.
Фаъолони Сӯх дар вохӯрӣ бо раиси ҳукумати Ӯзбекистон ба фаъолияти раҳбарияти Фарғона шадидан норозигӣ баён карданд.
"Моро таҳдид кард, ки ноҳияро аз харита хат зада, марзро мебандад", - гуфтанд онҳо. Сипас тамоми ҷамъшудаҳо шиор партофтанд, ки "Бигузор Ғаниев биравад!".