Өзін он баланың анасымын деп таныстырған Гүлмира Әлижанова биліктен баспана кезегін тездетуді, балаларын балабақшаға кезектен тыс қабылдауды, көп балалы аналардың жеке кәсіп бастауына қайтарымсыз қаржы бөлуді талап етті.
Жазира Әлдибекова есімді тұрғын 2014 жылдан бері үй кезегінде тұрғанын айтады.
- Жылына бес жүз адамға ғана жылжиды. Қазір кезекте 2282 боп тұрмын. Мына түріммен қай уақытта баспана аламын? Қызым екінші топтағы мүгедек. Кезекке соның атынан тіркелдік. Бірақ кезек келгенше ол он сегіз жасқа толып кетеді. Одан кейін басқа бір заң шығады ғой, - дейді ол.
Қасына әкімдік жанынан құрылған "Бақытты отбасы" ұйымының бірнеше өкілін ертіп келген Медеу ауданының әкімі Сұлтанбек Мәкежанов наразы әйелдердің сөзін үнсіз тыңдады. Оның орнына наразыларға өзін "Бақытты отбасы" ұйымының мүшесімін деп таныстырған Аида есімді әйел жауап беріп, "мәселенің барлығы біртіндеп шешіліп жатқанын" айтты.
- Көп балалы әйелдерге күніне төрт сағаттық жұмыс ұсынып отырмыз. Бүгін бес әйел келді. Аналарға кезегімен үй алып беріп жатырмыз, - дейді "Бақытты отбасы" ұйымының өкілі.
Наразы әйелдердің талабын тыңдаған әкім барлығын көлікке отырғызып, Медеу аудандық әкімдігіне алып кетті. Арада біраз уақыт өткенде Азаттық тілшісіне хабарласқан әйелдер "әкім ештеңені шешпей, құр қайтарғанын" айтты.
Былтыр наурызда Қазақстанның әр аймағында мемлекеттің мұқтаж жандарға әлеуметтік жәрдемді күшейтуді талап еткен көп балалы аналар наразылығы ұлғайған тұста үкімет әлеуметтік жағдайы төмен отбасыларға арналған "Бақытты отбасы" жаңа тұрғын үй бағдарламасына тұрғындардан өтініш қабылдауды бастаған. Аналар наразылығына 2019 жылдың ақпанында ел астанасында бір отбасындағы кәмелетке толмаған бес қыздың уақытша баспанада шыққан өрттен қазаға ұшырауы түрткі болған. Бағдарлама шарты бойынша, жеңілдікпен 18 жылға берілетін ипотекалық несиенің жылдық өсімі - 2 пайыз, бастапқы жарна - 10 пайыз. Жобаны сынаушылар көп баласы бар әлеуметтік жағдайы төмен отбасыларға ондай қарызды төлеу қиынға соғатынын айтады.