Асли Жалақудуқ туманидан бўлган аёлнинг ўзини осгани гумон қилинмоқда.
Ўтган йили турмуш қуриб¸ биринчи фарзандли бўлган ëш аёлнинг нега ўз жонига қасд қилганига оид тахминлар ҳозирча маълум эмас.
Перинатал марказ врачлари туққандан сўнг ëш аëл руҳиятида ўзгариш кузатилганини айтиш билан чекланди.
Андижон шаҳар Ички ишлар бошқармаси мулозимининг айтишича, ëш онанинг ўлими юзасидан вилоят прокуратураси терговгача суриштирув олиб бормоқда. Суриштирув жараëнида қандай тахминлар ўрганилаëтгани ҳақида ҳозирча маълумот йўқ.
Андижон вилоят Перинатал маркази врачининг айтишича, О.А. 2 июнь куни кесарево амалиёти билан соғлом бола туққан.
- Қорнидаги ҳомиласи бўғилиб қолмасин, деб кесарево қилинди. Чунки бола боши билан келмаганди. Аёлнинг ўзи реанимация бўлимида бир кун сақлангач, оддий палатага олиб ўтилди. 7 июнга ўтар кечаси ҳожатга чиқаман, деб кетиб, ювиниб келган, кийимларини алмаштирган ва ётган. Кейин ётган жойида ғойиб бўлган. 7 июнь саҳарда пастдаги ертўлага кираверишдаги тўсинга арқон боғлаб ўзини осган.
Биринчи фарзандини қўлига олган ëш аëлнинг ўз жонига қасд қилишга мажбур қилган омиллар ҳақидаги саволга тўхталган туғруқхона врачи¸ туғруқдан сўнг аёлнинг руҳий холатида ўзгариш кузатилгани ва буни палатадошлари ҳам пайқаганини таъкидлади.
- Ҳеч ким хафа қилган ҳам эмас, боласи соппа-соғ, эри ўзида йўқ ҳурсанд эди, ота бўлдим деб. Ўзи ҳам хурсанд эди ўғил туғдим, деб. Лекин палатада у билан бирга бўлган аёллар руҳий аҳволи ўзгарганини айтишди. Ғалати ҳолатда бир жойга тикилиб қараб ўтираверар экан. Жуда пастфеъл аёл эди, ҳайронмиз нимага бунақа бўлганига.
Аёлнинг қариндошлари ва маҳалладошлари кўзи ëригунга қадар келинчак хулқ-атворида ўзгариш кузатилмагани¸ унинг руҳий саломатлигида муаммо бўлмаганини билдирди.
Жалақудуқ тумани Ойим қишлоқ фуқаролар йиғинидан бўлган ëш аëлни билган маҳалладошларига кўра¸ у ўтган йили турмуш қурган.
Ўзбекистонлик гинеколог врач Гулбаҳор Собирова туққан аёлларда туғруқдан кейинги депрессия кўп учрашини айтади.
- Мен Андижондаги ҳолат бўйича бирон нарса айтолмайман. Лекин, янги туққан аёлларда "послеродовая хандра" ҳолати кўп учрайди. Туққандан икки-уч кун ўтиб баъзи аёллар руҳий, эмоционал ўзгаришларга дучор бўлади. Айнан мана шу даврда аёл доимий кузатувда бўлиши керак, умуман янги туққан аёллар мунтазам кузатиб борилиши керак, - дейди Собирова.
Андижон шаҳар Ички ишлар бошқармаси мулозими аёлнинг туғруқхонадаги шубҳали ўлими юзасидан вилоят прокуратураси терговга қадар суриштирув ишлари олиб бораётганини айтди.