Ссылки доступа

Россияда мигрантлар учун регистрация муддати узайтирилади, аммо патент талаб қилинади


Россияда муҳожирлар вазиятини тартибга солиш бўйича муваққат чоралар муддати 15 сентябргача узайтирилди. Президент Владимир Путин томонидан имзоланган бунга оид фармон матни Ҳуқуқий ахборот расмий интернет-порталида ёйинланди.

Россия президенти шу йил 18 апрелида чет элликларга берилган иш рухсатномаси, қайдга олиш, визалар муддатини автоматик тарзда 15 июнгача узайтириш тўғрисида қарор имзолаганди. Путиннинг бугунги фармони билан қайдга олиш ва визалар муддати 15 сентябргача узайтирилди.

Айни пайтда бундан буён Россияда патентсиз ишлаб бўлмайди. Лекин Россия расмийлари бу ерда ҳам муҳожирлар учун енгиллик берилганини иддао қилмоқдалар.

Қонунга мувофиқ, агар хорижлик шахс Россияда ишлашни режалаётган бўлса, унинг миграцион картасида мамлакатга келишдан мақсад ўлароқ “иш” деб ёзилган бўлиши лозим. Бусиз патент ёки иш рухсатномасини расмийлаштириб бўлмасди. Эндиликда бу талаб жорий йил 15 сентябригача бекор қилинади. Яъни миграция идоралари миграцион картада қанақа мақсад ёзилганидан қатъи назар патент ёки иш рухсатномаси учун ҳужжатларни қабул қилиб олишга мажбур.

15 сентябргача патент расмийлаштиришда чет эллик шахснинг Россияга қачон кириб келгани ҳисобга олинмайди. Яъни, агар у мамлакатга уч ой аввал кириб келган бўлса ҳам, ундан патент учун ҳужжатни жаримасиз қабул қилишлари шарт.

Путиннинг мазкур фармони 2020 йил 16 июнидан кучга киради.

XS
SM
MD
LG