Тожикистон Молия вазири Файзиддин Қаҳҳорзода 17 июн куни Радио Озоди билан суҳбатда баёнот бериб, мамлакатда маошлар тўловидаги муаммолар коронавирус эпидемияси билан боғлиқ эканлигини таъкидлади. Пандемия туфайли кўплаб соҳа, жумладан халқ таълими ходимлари муддатдан бир неча ой аввалроқ таътилга чиққани боис вазият мураккаблашди, деди вазир. «Ўқитувчилар май ойидаёқ таътилга чиқди. Авваллари улар уч ой мобайнида фақат ойлик маош оларди, энди эса биз уларга меҳнат таътили учун ҳам пул беришимиз керак. Шу сабабли биз режа ишлаб чиқишимиз ва шунга қараб бюджет ходимларига тўловларни амалга оширишимиз керак», дея таъкидлади Қаҳҳорзода.
Молия вазири бугунги кун ҳолатига кўра халқ таълими ходимлари маошлари учун қанча миқдорда қарздорлик мавжудлигини эълон қилиб ўтирмади, аммо тез орада бу қарздорлик бартараф этилишига ваъда берди.
Бундан аввалроқ Роғун шаҳридаги инженер-техник коллеж ўқитувчилари кўпойлик маошлари берилмаётгани борасида хабар берган эди. Коллеж «Роғун ГЭС» ОАЖ балансида туради. Шуниндек Кулоб шаҳридаги умумтаълим мактаблари ўқитувчиларидан ҳам расмийлар ойлик маошни тўламаётгани юзасидан шикоят келиб тушди, уларнинг таъкидлашларича, бир неча ойдан бери дўконлардан маҳсулотларни қарзга олишга мажбур бўлишаётган экан.
Тожикистондаги йирик саноат корхоналари, жумладан ТАЛКО ва Роғун ГЭСи ходим ва ишчилари ҳам ойлик маошлар тўланмаётганидан шикоят қилди. Роғун ГЭСи қурувчиларининг сўзларига қараганда, гидроэлектростанция қурилиш майдонларидаги ишлар ҳамон туну кун давом этмоқда. Аммо қурилишга жалб қилинган 25 минг кишидан фақат Италиянинг Salini Impregilо ва Россия компанияларининг ишчилари ўз вақтида маош олмоқда, дейди тожикистонлик ишчилар.
Тожикистон Меҳнат тўғрисидаги Кодексида ойлик маошлар ўз вақтида тўланмайдиган тақдирда иш берувчилар жазоланиши кўзда тутилган.
Тожикистон президенти ҳузуридаги статистика агентлигининг хабар беришича, шу йилнинг 1 апрелидан бери мамлакатда маошлар бўйича қарздорлик 51 млн. сомони ($5.1 млн)ни ташкил қилади, бу 2019 йилнинг биринчи чорагига нисбатан 27 фоиз кўпдир. Муассасанинг таъкидлашича, қарздорлик йил давомида тўпланиб қолган. Экспертларнинг сўзларига қараганда, Тожикистонда маошлар бўйича бу каби қарздорлик фуқаролар уруши давридан бери кузатилмаган эди. Маошлар бўйича қарздорликнинг 75 фоизи фойдали қазилмалар, транспорт ва қайта ишлаш соҳаси ҳиссасига тўғри келади.