Фармон виза истовчиларнинг катта категориясига: асосан юқори технологияли Америка саноат компаниялари томонидан ёлланадиган юқори малакали мутахассислар билан бир қаторда мавсумий ишчиларга ҳам тааллуқлидир. Оқ уй вакилларининг айтишларича, бу қарор коронавиус пандемияси туфайли АҚШда иқтисодий фаоллик пасайиши оқибатида ишдан айрилган америкаликларни иш ўринлари билан таъминлаш мақсадида қабул қилинди. Тақиқлов тиббиёт ходимлари ва озиқ-овқат саноатида банд бўлган ишчиларга тааллуқли эмас.
Президентнинг мазкур фармони апрелда жорий қилинган виза беришни тақиқлаш муддатини узайтиради. У сентябргача амал қилиши керак эди. Оқ уйнинг фикрича, шу тариқа мамлакатга 500 мингдан ортиқ ажнабийнинг киришига йўл қўйилмайди. Миграция сиёсати Институти ноҳукумат ташкилотининг фикрича, тақиқлов 325 минг хорижликка тегишли бўлади. Шу кунгача виза олишга муваффақ бўлганлар АҚШга киришлари мумкин.
Оқ уйнинг қарори айрим Америка компаниялари ва қонун чиқарувчилар томонидан танқид қилинди, уларнинг фикрича, Қўшма Штатлар юқори малакали ишчилар, айниқса дастурчи ва инженерларга эҳтиёж сезмоқда. Google раҳбари Сундар Пичай президент Трамп қароридан “хафсаласи пир бўлганини” билдирди. Twitter корпорпацияси вакили бу қарорни Қўшма Штатлар "иқтисодий пойдеворига зарар етказувчи, узоқни кўра билмаслик" дея атади. Сенатор-республикачилар Линдси Грэм ва Джон Корнин президентга мурожаат қилиб қарорни қайта кўриб чиқишга чақирди. Wall Street Journal газетасининг ёзишича, президент қарори судда кўриб чиқилиши мумкин.
Жамоатчилик фикрини ўрганиш хулосаларига кўра, АҚШ аҳолисининг кўпчилиги, иммигрантлар асосан америкаликларни қизиқтирмайдиган ишларни бажаришларини айтишган.