Адлия вазирлиги томонидан ишлаб чиқилган қонун лойиҳасида “Деҳқон хўжалиги тўғрисида"ги қонунга ўзгартиш ва қўшимчалар киритиш таклиф қилинган. Лойиҳа муҳокамаси 3 июлгача давом этади.
Қонун лойиҳасида деҳқон хўжалиги учун ер участкаларини мерос қилиб қолдириладиган умрбод эгалик қилиш ҳуқуқи билан ажратиш тартибини бекор қилиш кўзда тутилган. Амалдаги қонунда эса, деҳқон хўжаликларига ердан умрбод фойдаланиш ва мерос қолдириш ҳуқуқи берилган.
“Деҳқон хўжалиги тасарруфидаги ер участкасидан мақсадли ва оқилона фойдаланиши назорат қилиш ваколатли давлат органлари томонидан амалга оширилади. Деҳқон хўжалиги йўналиши бўйича қишлоқ хўжалиги экинларини экмаган тақдирда, ер солиғи белгиланган ставканинг уч баравари миқдорида ундирилади”, — дейилади қонун лойиҳасида.