Ссылки доступа

Қозоғистон ҳукумати 5 июлдан кескин карантин жорий қилмоқчи


Қозоғистон президенти Қасим-Жомарт Тоқаев 1 июл куни баёнот берар экан, ҳукумат мамлакатда 5 июлдан бошлаб икки ҳафталик карантин жорий қилиш таклифини берганини айтди.

"Ҳукумат 5 июлдан 14 кун (эҳтимол узайтирилар) муддатга карантин жорий қилиш режасини тақдим қилди. Эртага мажлисдан сўнг соғлиқни сақлаш вазири тушунтириш беради", – дея ёзди Қозоғистон президенти ижтимоий тармоқларда.

Икки кун аввал Тоқаев ҳукумат аъзолари иштирокида бўлиб ўтган видеоконференцияда мамлакатда кескин карантин жорий қилиш таклифини тайёрлаш учун икки кун муҳлат берган эди. Бу каби карантин жорий қилиш ғояси май ойига қадар мамлакатда амал қилган карантин чораларининг юмшатилиши туфайли COVID-19га чалинганлар сони бирдан ошиб кетганидан сўнг келди. Тоқаевнинг сўзларига қараганда, 11 майдан (карантин бекор қилинган кун) бошлаб мамлакатда беморлар сони етти баробар ошиб кетган.

Яқинда Қозоғистон соғлиқни сақлаш вазири этиб тайинланган Андрей Цой карантин ғоясини қўллаб-қувватлади ва тўрт ҳафталик тўла локдаун "мамлакатни ҳалокатдан қутқариб қолади" деди. Унинг айтишича, агар Қозоғистонда тўрт ҳафталик карантин жорий қилингудек бўлса, у ҳолда август ойи сўнгида мамлакатда COVID-19 билан боғлиқ вазият барқарорлашади ва бир кунда 2500 нафар бемор қайд қилинади – "бу ҳозирги вазиятга тўла мос келади".

Агар икки ҳафталик миллий локдаун қўлланилса, у холда Соғлиқни сақлаш вазирлиги шифохонага ётқизиладиган коронавирус беморлари сони бир кунда етти мингтани ташкил қилишини прогноз қилмоқда. Бу режа амалга оширилса Қозоғистонда койкаларга эҳтиёж август ойи сўнгида 80 мингтани ташкил қилади, дея огоҳлантирди вазир. Қозоғистон шифохоналарида шунча ўрин йўқ.

1 июл ҳолатига кўра Қозоғистонда коронавирусга чалинганлар сони 41 минг кишидан ошиб кетди. Беш мингдан ортиқ киши Нур-Султон ва Олмаотада, 3 мингдан ортиғи Чимкентда қайд қилинди. Сўнгги кунларда Қозоғистонла 1604 кишининг коронавирусга чалингани маълум бўлди.

Олмаотадаги шифохоналарнинг 24 июн кунги ҳолатгга кўра бандлиги 95%ни ташкил қилди. Ўринлар муаммосини ҳал қилиш мақсадида, 29 июн куни маълум бўлишича, ҳукумат Олмаотадаги "Халық Арена" спорт саройини шифохонага айлантиради ҳамда Нур-Султондаги "Рамада Плаза" отелида коронавирус беморлари учун 500та койкали ўрин яратади.

XS
SM
MD
LG