Ссылки доступа

Президент Бразилия ба коронавирус мубтало шуд


Президенти Бразилия Жаир Болсонару рӯзи сешанбе дар як суҳбати телевизиониаш хабар дод, ки натиҷаи санҷиши ӯ барои вирус мусбат баромадааст.

Болсонару ба хотири бештар шудани нишонаҳои беморӣ, аз ҷумла баланд шудани тасф як рӯз пеш бори панҷум озмоиш супорида буд. Болсонару дар гузашта борҳо нигарониҳои ҷомеаро дар робита ба коронавирус "муболиға" ва "беасос" меномид. Ӯ ҳатто аз раҳбарони минтақаҳои кишвараш хост, маҳдудиятҳоеро сабуктар созанд, ки ба гуфтааш, ба иқтисод осеб мерасонанд.

Вай дар суҳбати телевизионӣ дар бораи баланд шудани ҳарорати баданаш ҳарф зада, вале гуфт, "аллакай поин рафтааст ва худамро хуб ҳис мекунам".

Ба гуфтаи Болсонару, ӯ нишонаҳои бемориро рӯзи якшанбе бори нахуст ҳис карда, аввал тасфаш баланд шудааст. Сипас сулфа зиёд шуда, нафастангӣ пайдо гаштааст. Рӯзи душанбе вазъаш бадтар шуда, дубора озмоиш супоридааст.

Жаир Болсонару моҳи апрели соли равон гуфта буд, ки агар ба коронавирус мубтало ҳам шавад, нигарон нахоҳад шуд. Зеро онро монанди як зукоми сабук ё сармохурдагӣ пушти сар хоҳад кард. Вакте президенти Бразилия ин суханҳоро мегуфт, шумори фавтидагон бар асари коронавирус дар ин кишвар ба 3 ҳазор расида, ҳудуди 40 ҳазор одам ба он мубтало шуда буданд.

Дар ҳоли ҳозир дар ин кишвар авҷи беморӣ мушоҳида шуда, 65 ҳазор бемор ҷон бохта, 1 600 000 кас ба вирус мубтало шудаанд.

XS
SM
MD
LG