Бир кун аввал Болсонару кўпайиб бораётган аломатлар, жумладан юқори ҳарорат туфайли тўртинчи бор тест топширди. Би-би-сининг маълум қилишича, Болсонару бир неча бор вирус борасида жамоатчилик ҳаддан зиёд қўрқитилаётганини айтган, уни “оддий шамоллаш” дея таъкидлаган ва жиддий оқибатларга олиб келмаслигини таъкидлаган эди. Шу шунингдек, минтақа губернаторларига мурожаат қилиб иқтисодиётга зарар келтирувчи чекловларни юмшатишга чақирган эди. Душанба куни президент ниқоб тақишдаги кескин талаблар юмшатилишини эълон қилди.
Сешанба кунги телеинтервьюсида у тана ҳарорати кўтарилганини, кейинроқ пасайганини, ҳамда "ўзини жуда ҳам яхши ҳис қилаётганини" айтди.
Болсонарунинг айтишича, ўзида касаллик аломатларини якшанба куни ҳис қила бошлаган: ҳарорати кўтарилган, йўтал кучайган ва аҳволи ёмонлашган. Душанба куни аҳволи баттар ёмонлаша бошлаган ва коронавирусга яна бир бор тест топширган.
Аввалроқ, апрел ойида Жаир Болсонару ҳатто ўзи коронавирусга чалинган тақдирда ҳам хавотирга тушмаслигини, ўзи билан шунчаки грипп ёки шамоллаш юз бериши мумкинлигини айтган эди.
Бразилия президенти бу баёнотни берганида мамлакатда ўлим ҳолати 3 минг атрофида, касалликка чалинганлар эса таҳминан 40 минг кишини ташкил қиларди.
Кўп ўтмай эпидемия кўрсаткичлари бирдан кўтарилди. 6 июл куни ўлим ҳолатлари 65 000дан ошиб кетди, касалликка чалинганлар эса 1 600 000 дан кўпайди.
Касалликка чалинганлар ва қурбонлар сони ошиб бораётганига қарамай президент Болсонару минтақалардаги карантин чоралари вирусга қараганда кўпроқ оғир оқибатларга олиб келишини айтган эди. Болсонару матбуотни ваҳимага солувчи хабарлар тарқатишда айблади.