"Киев төрт категория бойынша тұтқын алмасу жөніндегі осыған дейінгі келіссөзден бас тартып отыр. Киев делегациясы тағы екі категория қосуды сұрап жатыр", - деп мәлімдеді Украинаның шығысындағы жанжалды реттеу жөніндегі үшжақты байланыс тобының ресейлік өкілі Грызлов.
Ол мұндай іс-әрекеттер тұтқын алмасу процесін тежейді деп атап өтті.
Украина тарапы бұл мәлімдемеге әзір жауап бермеді. "РБК-Украина" агенттігінің жазуынша, Киев Минск форматы келіссөзінде "бәрін бәріне" ұстанымы бойынша барлық тұтқынды босатуды талап еткен.
7-8 шілдеде Донбасс мәселесіне қатысты байланыс тобының кезекті отырысы өткен. Келіссөз коронавирус эпидемиясына байланысты онлайн режимде өтіп жатыр. Келесі отырысы 22 шілдеге белгіленді.
Биыл сәуір айында Киев пен өзін өзі жариялап алған Донбасс тұтқын алмасқан. Украина 14, сепаратистер 20 тұтқынды босатқан.