Ссылки доступа

Баъди ду шаби беназмиҳо дар Сербия аъзои тими изтирории коронавирус ташкили ҷаласа мекунанд


Қарор аст, имрӯз, 9 июл тими изтирории муқобила бо коронавируси Сербия баъди шаби дуюми задухӯрдҳо дар Белград дар заминаи вокуниши ҳукумат ба пандемия, ташкили ҷаласа кунад.

Шаби 8 июл полис барои пароканда кардани мардум аз гази ашковар истифода кард. Эътирозҳо баъди он шурӯъ шуд, ки рӯзи 7 июл президент Александр Вучич гуфт, бо сабаби болоравии ҳолатҳои олудагӣ ба коронавирус дар кишвар дубора карантин ва қуюди шабгардӣ ҷорӣ мешавад. Вучич рӯзи 8 июл гуфт, ӯву мақомот дар фикри ин ҳастанд, ки қуюди шабгардии рӯзҳои истироҳатро бекор кунанд, вале охирин қарор рӯзи 9 июл эълон мешавад.

Изҳороти Вучич баъди он садо дод, ки дар Белград ва Нови Сад эътирозгарон ба биноҳои мисли идораи радиову толори консертии маҳаллӣ сангандозӣ карданд. Нахуствазир Ана Брнабич эътирозҳоро “пурхушунаттарин” номид ва гуфт, ки намегузорад дар Сербия харҷу марҷ шавад. Ӯ гуфт, тими изтирорӣ масъалаи “мубориза бо вирус ва ҳифзи ҷои кору саломатии мардум”-ро баррасӣ мекунад.

Дар Сербистон бештар аз 17 ҳазор кас ба коронавирус мубтало ва бештар аз 340 кас аз ин вирус фавтидааст.

Баъди интихоботи порлумонии 21 июн, ки бо пирӯзии ҳизби ҳукмрон ба поён расид, мақомот ба далели бад шудани вазъи беҳдоштӣ тадбирҳои карантинро дубора барқарор карданд. Эътирозагрони бо роҳбарии мухолифони давлат ҳоло талаб доранд, ки ин тадбирҳо бекор шаванд. Зеро ба гуфтаи онҳо, тадбирҳои муқобила бо COVID-19 "сиёсишудаанд".

XS
SM
MD
LG