Ибрагимов армияга 2019-жылы ноябрда чакырылып, декабрда аскердик кызматтан бошонуу максатында 17 ташты жутуп жиберген.
Тажикстандын мыйзамдарында денеге доо кетирүү аркылуу аскердик кызматтан качуу үчүн беш жылга чейин эркинен ажыратуу жазасы каралган.
Соттун материалдарында катардагы жоокер алгач жети таш жутуп алганы жазылган. Ал кызматтан убактылуу бошотулуп, Коргоо министрлигинин аскердик госпиталына жаткырылган. Бирок андагы дарыгерлер «ага керектүү корутунду чыгарбагандыктан», ал декабрдын аягында дагы он таш жутуп алган. Иштин материалдарында ал мындай кадамга «кызматтан толук бошонуу» максатында баргандыгы жазылган.
Жергиликтүү укук коргоочулардын айтымында, тажикстандыктардын көбү армияга барууну каалашпайт. Алар эмгек миграциясына кетүү, жогорку окуу жайга тапшыруу сыяктуу жолдор менен аскердик кызматтан качышат. Буга тажик армиясындагы «чоңсунган зомбулук» себеп экени айтылып келет.
Кыйноолорго каршы коалициянын маалыматына караганда, 2014-жылдан 2016-жылга чейин армияда кызмат өтөп жаткан жоокерлердин туугандарынан 60 кайрылуу болгон. Алардын 11и жоокерлердин өлүмүнө байланыштуу болгон.
