Адамдар дәріхана кезегінде бірнеше сағат тұрып, бағасы 3-4 есе қымбаттаған дәріні алуға мәжбүр. Денсаулық сақтау министрлігі болса дәріні дәрігердің кеңесінсіз қабылдауға болмайтынын ескертіп жатыр.
Дәрі іздеу – Қырғызстанда телеграм-чаттардағы ең көп таралған тақырып. Бір минутта мұнда жүздеген хабарлама түседі. Адамдар негізінен дәрінің бес-алты түрін іздейді. Олардың дені - пневмония мен коронавирусты емдейтін антибиотиктер. Қырғызстанда дәріханаларда бұл дәрілер жоқ.
"Парацетамол жоқ, кетонал жоқ", – деп айтудан дәріхананың бір сатушысы әбден шаршады. Мұнда аскорбин қышқылы да табылмады. Кезекте тұрғандар барлық дәріханаға барып, бір дәрі таппағанын айтты.
"Тромбас таппадым, аспирин жоқ, парацетамол сатып алдым", – дейді кезекте тұрған бір әйел.
Дәрі табылмай жатқанда оның бағасы үш-төрт есе қымбаттап кетті. Шенеуніктер алып-сатарлар қатаң жазаланатынын ескертіп жатыр, бірақ одан нәтиже шығар емес.
Ауруханаларда да дәрі тапшы: еріктілер дәрі-дәрмек жетіспей жатқанын үнемі жазып жүр.