lrytas.lt ахборот портали хабарига кўра, коронавирус юқтириб олганларнинг ҳаммаси ўзбекистонлик бўлиб, улар халқаро транспорт ширкатига июль ойи бошида ишлаш учун келганлар. Ҳозирда уларнинг кўпчилиги Абромишкес реабилитация касалхонасида изоляцияда тутиб турилгани айтилмоқда.
Нашрга кўра, коронавирусга чалинган ўзбеклардан бири ўзига ҳеч қанақа тиббий ёрдам кўрсатилмаётганини айтиб, агар аҳвол шундай давом этаверса, кўчага чиқиб, чор-атрофдагиларга инфекция юқтириш билан таҳдид қилган.
“Агар тест ижобий чиққан бўлса, тиббий ёрдам олишимизга имкон беринг. У ерда дори-дармон ҳам, бошқаси ҳам йўқ. Акс ҳолда, шаҳарга бориб, ҳаммага юқтира бошлаймиз. Бундан ким ютади?” деган исмини айтмаган ходим.
Литва Жиноят кодексида бошқаларга атайлаб вирус юқтирганлик учун жавобгарлик кўзда тутилган.
Ўзбекистонлик муҳожирга кўра, ширкат ходимларидан биронтаси ҳам ўз тести натижасини кўрган эмас ва шу пайтгача кимнинг инфекция юқтиргани, кимнинг эса юқтирмаганини ҳам билган эмас.
“Кеча ҳаммамизни шу реабилитация марказига олиб келишди. Бизга “касаллик юқтиргансизлар”, деб айтишди. Ишдан кейин тўғри шу ерга келдик ва бизни шунчаки қолдириб кетишди… Бу ерда врачлар ҳам йўқ, бир ҳамшира юрибди, холос. Келганимизда, бизга овқат беришди, биз ўзимиз билан ҳеч нарса олиб келолмагандик. Хасталикни ким биринчи бўлиб юқтириб олганини ҳеч ким билмайди”, деган у lrytas.lt порталига.
Сўнгги маълумотларга кўра, Литвада коронавирус инфекциясини юқтириб олиш билан боғлиқ 1900 дан зиёд ҳолат қайд этилган, вирусдан 79 бемор вафот этган.