Бу ҳақда Озодликка 23 июль куни соғлиқни сақлаш вилоят бошқармаси хабар берди. Полициянинг хабарига кўра, тергов бошланган, “безорилик” гумони билан тўрт киши қўлга олинган.
Туркистон вилояти полиция департаменти баёнотига кўра, Шорнак қишлоғида бир эркак ва унинг ҳамқишлоқлари ўртасида “безориликка айланиб кетган ёқалашув” юз берди. Полиция маълумотига кўра, кейинроқ жабрланувчининг уйига номаълум шахслар келиб, “унинг уйи ва қўшни уйга тош отишни бошлашган”. Натижада уч киши яраланди. Воқеа жойига келган участка полиция нозири жан жароҳати олди, дейилади полиция баёнотида.
Ижтимоий тармоқлардаги хабарларга кўра, қозоқлар ва ўзбеклар ўртасида муштлашув содир бўлган. 11 мингдан зиёд аҳоли яшайдиган Шорнакда асосан қозоқлар ва этник ўзбеклар истиқомат қилади. Полиция ҳодисанинг этник характерини рад этади.
Ижтимоий тармоқларда тарқатилган видеоёзувда полиция формасидаги, куйлаги ва юзида қон излари бўлган эркак киши акс этган. Кадрда унинг ёнида турган одамлар “тош отганлар” ҳаракатини қораламоқда. Полиция департаменти баёнотида айтилишича, участка нозири қишлоқликлар томонидан “ўқ отиш қуролларининг қўлланишига йўл қўймаган”.
«Озодлик» изоҳ сўраб Шорнак қишлоқ округининг ҳокимиятига мурожаат қилди. Қўнғироққа жавоб қайтарган ходим изоҳни фақат полиция департаменти тақдим этишини айтди, унга кўра, ҳоким жойида йўқ: у қишлоқ оқсоқоллари билан чиқиб кетган. 23 июл куни ижтимоий тармоқларда тарқатилган видеоларнинг бирида ҳарбий формадаги одамлар, шунингдек мактабга ўхшаган бино ортида турган қишлоқликлар акс этган.
Туркистон вилояти соғлиқни сақлаш бошқармаси хабарига кўра, Шорнак қишлоғининг уч нафар турғуни 21 июль куни Туркистон шаҳар марказий касалхонасининг травматология бўлимига келтирилган. Бошқармадан «Озодликка» айтишларича, 1997 ва 1998 йилларда туғилган икки турғун ўртача оғирликдаги тан жароҳатини олган ва уларнинг ҳаётига хавф йўқ. Яна бир турғун, 1998 йилда туғилган киши кўз жароҳати билан ётқизилган, унинг ҳолати оғир деб баҳоланмоқда.