Бу ҳақда Германия ташқи ишлар вазири Хайко Маас баёнот берди. Унга кўра, халқаро клубга қайтиш учун Москва аннекция қилинган Қрим масаласи ва Украина шарқидаги вазиятни барқарорлаштириши керак. Маас эслатиб ўтганидек, айни муаммолар туфайли 2014 йили Россияни “катта саккизлик”дан чиқаришган ва шунинг учун ҳозир мажлис G7 шаклида ўтмоқда.
Германия ташқи ишлар вазирининг яна қайд этишича, Россия Украина, Сурия ва Ливиядаги можароларни ечиш учун бошқа мамлакатларга керак. Бироқ, Маас фикрича, бунинг учун ҳаммасидан кўра кўпроқ “катта йигирматалик” шакли тўғри келади.
Аввалроқ, АҚШ президенти Дональд Трамп Россия президенти Владимир Путинни саммитга таклиф этиш оқилона бўлишини айтган эди. Оқ уй раҳбарининг фикрича, G7 учрашувларидаги мавзуларнинг деярли ярмини Россия иштирокида муҳокама қилиш зарур. Аммо клубнинг қолган иштирокчилари Трамп ғоясини қўллаб-қувватлашмади.
Россия президенти Владимир Путин олдинроқ мамлакатининг “катта саккизлик”ка қайтарилишига қарши эмаслигини айтган эди.
G7 халқаро клубига Буюк Британия, Германия, Канада, Франция, АҚШ ва Япония аъзо. Россия ташкилотга 1997 йили қўшилган. Қрим аннексияси ва Украина шарқидаги можародан кейин 2014 йилда Москванинг клуб ишидаги иштироки тўхтатилган эди.