Хабарларга кўра, О’Брайенда хасталик оғир кечмаяпти, у ўзини ўзи изоляция қилган ва айни пайтда ишини давом эттирмоқда.
Associated Press агентлиги қайдича, Трампнинг маслаҳатчиси шу кунгача коронавирусга чалинган энг юқори лавозимли мулозим бўлиб ҳисобланади. Аввалроқ президент аппаратининг бир неча ходимида вирус аниқланган. Оқ уйнинг ишонтиришича, президент ёки вице-президентнинг хасталик юқтириб олиш хавфи йўқ.
Коронавирус эпидемияси бошланганидан бери қатор давлат ва ҳукумат раҳбарлари, шу жумладан Бразилия президенти ва Россия бош вазири хасталикни бошдан кечирган. Уларнинг ҳаммаси соғайиб кетган. Хасталикнинг энг оғир шакли Британия бош вазири Борис Жонсонда кузатилган. У бир неча кунни интенсив терапия палатасида ўтказган.
Қўшма Штатларда коронавирусга чалиниш бўйича кунига 50 мингдан зиёд ҳолат аниқланмоқда, бир кеча-кундуздаги қурбонлар сони эса сўнгги пайтларда яна кўпая бошлади ва кунига баъзан 1000 нафардан ошяпти.
Эпидемия бошидан бери АҚШда 4 миллион 300 минг кишида вирус аниқланган, бу мамлакат аҳолисининг 1 фоиздан ортиқроғини ташкил қилади. COVID-19 важидан мамлакатда шу кунгача 150 мингдан зиёд бемор нобуд бўлган. Ҳар иккала кўрсаткич бўйича ҳам Қўшма Штатлар дунёда биринчи ўринда бормоқда.