Ссылки доступа

Мали президенти ҳарбийлар исёни ортидан истеъфо берди


Мали президенти Иброҳим Бубакар Кейта 18 август куни бош вазир Бубу Сиссе билан исён кўтарган ҳарбийлар томонидан қўлга олинганидан сўнг телевидение орқали чиқиш қилиб, истеъфо берганини билдирди.

Президент, шунингдек, ҳукумат ҳам истеъфога чиқарилганини ва парламент тарқатиб юборилганини айтди.

Кейта ҳокимиятни ўз қўлида сақлаб қолиш мақсадида қон тўқиш ниятида эмаслиги учун истеъфо беришга қарор қилганини таъкидлади.

Ҳарбий тўнтариш Мали пойтахти Бамако яқинидаги Кати ҳарбий базасидаги отишмадан бошланди. Ҳарбий базани эгаллаган исёнчилар пойтахтга йўл олди. Улар президент резиденциясига ҳужум қилиб, президент ва бош вазирни асирга олди.

Ҳарбийлар исёнини Африка иттифоқига аъзо давлатлар, Ғарбий Африка ва Франция Иқтисодий ҳамкорлиги ташкилоти қоралади. Мали 1960 йилда Франциядан мустақил бўлган эди.

БМТ Бош котиби Антониу Гутерриш исёнчиларни мамлакат раҳбарларини зудликда озод этишга ва мамлакатда конституциявий тартибни қайта тиклашга чақирди.

Малида ёз фаслининг бошларидан бери мухолифат президент истеъфосини талаб қилиб келаётгани ортидан сиёсий инқироз юзага келган эди. Иброҳим Бубакар Кейта 2013 йилда президентликка сайланган эди. Ундан аввалги президент ҳокимиятга ҳарбий тўнтариш йўли билан келган, кейин ўзи ҳам норозилик намойишлари ортидан ҳокимиятдан ағдарилган эди.

Малида БМТ Тинчликпарвар кучлари жойлаштирилган. Кейта ўтган йили мамлакат марказий қисмида аҳолининг оммавий қирғин қилиниши ортидан армия қўмондонларини истеъфога чиқарган эди.

XS
SM
MD
LG