Бу маълумотлар Тожикистон президенти Эмомали Раҳмон томонидан 20 август куни Тоғли Бадахшон Мухтор вилояти Ванч тумани раҳбарияти, фаоллари ва аҳолиси билан бўлиб ўтган учрашувда айтилди.
Раҳмоннинг айтишича, 12 нафар жангари ушланди ва Тожикистонга қайтарилди, улардан 8 нафари тез орада суд олдида жавоб беради.
"Шу билан бирга 1992 йилдан 2015 йилгача туманда яшовчи 96 нафар киши хорижий диний таълим даргоҳларида норасмий равишда таълим олган, улардан 92 нафари Ватанга қайтарилди, 4 нафари эса ҳамон Миср пойтахти Қоҳирада норасмий равишда ўқишни давом эттирмоқда ", дея қўшимча қилди тожик президенти.
Эмомали Раҳмон чоршанба кундан бери амалий ташриф билан ТБМВда бўлиб турибди.
Мамлакатни тарки этган 2 мингдан ортиқ тожикистонлик Сурия ва Ироқдаги “Ислом Давлати” (ИД) гуруҳи жангарилари сафига қўшилди. Аввалроқ улардан 300 нафари ҳалок бўлгани айтилган эди. ИДнинг Сурия ва Ироқда мағлубиятга учраганидан кейин Тожикистонда туғилган жангариларнинг тақдири номаълум бўлиб қолмоқда.
Экспертларнинг фикрича, кўплаб тожикистонликлар ишсизлик, келажаклари ноаниқ, дунёвий ва диний таълим паст даражада бўлгани, мамлакатда эркинлик ва диний ҳуқуқлар бузилаётгани боис террорчилар сафига қўшилган.