Ссылки доступа

Қирғизистон омода нест, бо Узбекистон парвоз барқарор кунад


Ҳукумати Узбекистон ба ҷониби Қирғизистон пешниҳод кард, ки байни ду кишвар парвози ҳавопаймоҳо барқарор шавад. Аммо ҳукумати Қирғизистон гуфтааст, айни замон омода нест, ки ин масъаларо баррасӣ кунад.

Дар Оҷонси авиатсиаи шаҳрвандии вазорати нақлиёт ва роҳҳои Қирғизистон гуфтанд, ин масъала танҳо дар ҳолати беҳ шудани вазъи гирифторӣ ба коронавирус ва бозшавии марзҳо баррасӣ хоҳад шуд.

Мақомоти Оҷонс гуфтанд, коршиносон бар ин назаранд, ки вазъи коронавирус чи дар Қирғизистон ва чи дар Узбекистон ҳамоно боиси нигаронӣ аст.

Ин дар ҳолест, ки Қирғизистон пешниҳоди барқарории парвозҳоро ба Русия, Қазоқистон ва Кувейт кардааст. Аммо ин кишварҳо ба пешниҳоди Қирғизистон ҳанӯз посух надодаанд.

Дар пайи паҳншавии вируси корона Қирғизистон аз моҳи марти соли ҷорӣ парвозҳои байналхалқиро қатъ кард.

Ин кишвар сар аз 7 август бо Туркия ва Имороти Муттаҳидаи Арабӣ парвоз барқарор кардааст.

XS
SM
MD
LG