Ссылки доступа

Der Spiegel: Навальный өзүнө келип, ууланганга чейинки окуяларды эстеди


Омск аэропортунда Алексей Навальныйды тез жардам унаасы менен алып кетишүүдө

Берлиндеги «Шарите» ооруканасында дарыланып жаткан орусиялык саясатчы Алексей Навальный комадан чыгарылгандан кийин өзүнө келди. Бул тууралуу The Insider, Bellingcat жана Der Spiegel басылмалары өз булактарына таянып билдиришти.

Маалыматтарга караганда, Навальный ууланганга чейин болгон бардык окуяларды, Томск-Москва каттамы менен учуп келатканда өзүн жаман сезгенге чейин эмнелер болгонун эстеди. Ага башка кишилер да киргизиле баштады — буга чейин саясатчынын палатасына дарыгерлер жана аялы гана кирүүгө укуктуу болчу.

Навальныйдын басма сөз катчысы Кира Ярмыш басылмалардагы билдирүүлөрдө так эмес маалыматтар көп экенин билдирди.

Der Spiegel басылмасы Навальный өзүнө келгенден кийин «Шарите» ооруканасында коопсуздук чаралары күчөтүлгөнүн жазды.

Дарыгерлердин айтымында, физикалык жактан Навальный кеминде 90% чейин калыбына келе алат. Азыр ал психикалык жактан дээрлик толугу менен калыбына келди.

Шаршембиде Die Zeit басылмасы өз булактарына таянып, Алексей Навальный "Новичок" затынын жаңы түрү менен ууландырылганын, ал мурункусунан да коркунучтуу экенин билдирген.

Басылма жаңы ууну атайын кызматтын лабораториясынан гана аныктоого мүмкүн болгонун белгилеп, ууландыруу операциясын Орусиянын Федаралдык коопсуздук кызматы (ФСБ) гана жасай алмак деген жыйынтык чыгарган.

Die Zeit басылмасы атайын кызматтын агенттеринин бири ууну Навалныйдын чайына кошуп же сееп кеткен болушу мүмкүн деп божомолдоодо. Уунун калдыктары Навалныйдын колунан жана ал ичкен суунун бөтөлкөсүнүн оозунан табылган.

Немис басылмасы кылмышкерлердин планы боюнча Навальный Томскиден Москвага сапар алган учактын ичинде өлүшү керек болчу деп божомолдоодо. Ал учакты дароо кондуруу чечимин кабыл алган жана оппозиционерге дароо атропин сайган дарыгерлердин аракетинен улам гана аман калган.

Die Zeit басылмасынын журналисттери Навалныйды ууландырууга Кремль гана буйрук берген болушу ыктымал деген бүтүмгө келишкен.

44 жаштагы Навальный 20-августта эртең менен Томск шаарынан Москвага учак менен келатып, өзүн жаман сезе баштаган. Алгач Омскидеги ооруканага жаткырылган Навальный бир нече күндөн кийин Берлинге жеткирилген.

Берлин Кремлди сындап келген саясатчы анын «көзүн тазалаш үчүн» нервди шал кыла турган зат менен ууландырылганын жарыялаган. Москва болсо мындай шашылыш тыянак чыгарбай турууга чакырган.

XS
SM
MD
LG