– Прокуратура сот орындаушыларынан өндіріс құжаттарын сұратып, заңдылығын тексеретінін хабарлады. Әзірге іс тоқтатылды. Енді бізде қосымша уақыт бар, – деді Азаттыққа "KAZ Феррит" компаниясының заңгері Асхат Ниязов.
Қарағанды облысының прокуратурасы сот шешімін орындау тоқтатылғанын растады. Бұған дейін жергілікті сот "KAZ Феррит" пен "СВХ-Портал" компаниясы арасындағы жер дауы мәселесін қарап, "СВХ-Порталды" байыту фабрикасының өндіріс линиясы орналасқан аумақтың иесі ретінде таныған болатын.
7 қыркүйекте Қарағанды маңындағы "KAZ Феррит" фабрикасының жүзден астам жұмысшысы наразылық акциясын өткізген.
Сотта жеңген "СВХ-Портал" компаниясының өкілдері бұған дейін осы аумақтан өздері де пайда тапқысы келетінін айтып, "KAZ Ферриттің" жалға алу шартымен келіспей отырғанын жеткізген.
Ал оқиға орнына келген билік өкілдері өндіріс линиясы орналасқан аумақты мемлекет меншігіне қайтару мәселесін қарастыратынын айтқан. Қарағанды әкімдігінің жер қатынастары бөлімінің мамандары егер жер мемлекет меншігіне өтсе, оны пайдалану мәселесін мемлекеттік комиссия шешеді деген еді.