Ербол Есхожиннинг адвокати Ольга Эннснинг Азаттиқ радиосига маълум қилишича, прокурор Ербол Ибрагимов Олмаота туман №2 суд мажлисида Есхожинга нисбатан 80 соатлик жамоат ишларига жалб қилиш жазоси берилишини сўради.
Адвокат шунингдек, ишни кўриб чиқаётган судья Амиргалиев тергов муддати максимал даражадан ошиб кетгани борасидаги эътирозларга қарамай айблов ҳукмини чиқарганини айтди.
- Бизнинг фикримизча, судга қадар тергов муддати бузилган. Биз муддат бузилгани боис барча протоколлар тан олинмаслигини сўрадик. Қилмишлар бўйича судланиши керак, – дейди Эннс Азаттиққа изоҳ берар экан. Унинг қўшимча қилишича, қарор юзасидан апелляцион инстанцияга шикоят қилади.
Адвокатнинг хабар қилишича, судья тергов идораларига нисбатан “шунчаки” қарор чиқарган. Унинг айтишича, судда жабрдийда сифатида иштирок этган ходим ўз кўрсатмаларини ўзгартирган.
Фаол Ербол Есхожин Азаттиққа берган изоҳида, суд қарорига рози эмаслигини ва апелляция шикояти билан мурожаат қилишини айтди. Есхожиннинг сўзларига кўра, белгиланган жаримани тўлашга қурби етмас экан.
– Судья адвокатнинг «процессуал муддатлар борасидаги» эътирозларига жавоб берар экан, сўз ижтимоий тармоқларда айтилганини ва уни “жуда кўп одамлар тинглагани”ни таъкидлади. Расмийлар фуқаролар фаолларининг сафлари кенгайиб бораётганидан хавфсирамоқда. Аммо одамларда қўрқув ҳисси аллақачон йўқолган, – дейди Есхожин.
Бу иш бўйича суд жараёнлари 24 августда бошланди, бешта суд мажлиси ўтказилди. Есиль туман судида кўрилаётган иккинчи иш бўйича суд мажлиси 17 сентябр куни бўлиб ўтади. Бу жиноий ишнинг иккига бўлингани билан боғлиқ. Адвокатнинг айтишича, иккита ишни бирлаштириш бўйича Есиль туман судига мурожаат қилган, аммо судья гап жиноий қилмиш ҳақида бораётгани боис илтимосни инкор қилган.
Есхожинга нисбатан жиноий иш очилишига унинг 20 январ куни Нур-Султондаги АҚШ элчихонаси ва 3 феврал куни «Байтерек» ҳайкали олдида сиёсий маҳбусларни озод қилишга бағишлаб бўлиб ўтган норозилик намойишлари вақтида полиция шаънига айтган гаплари сабаб бўлди.
Есхожин иши бўйича жабрдийда сифатида кўрилаётган Нур-Султон полицияси криминалистлари Абилайхан Саулембеков ва Арман Тускеев аввалроқ ўз кўрсатмаларида АҚШ элчихонаси ва “Байтерек” ёдгорлиги олдидаги митинглар суратга олинаётганида кимдир уларнинг шаънига: «Манга кучуклар келди, Назарбоевнинг кучуклари келди» деганини ва бу сўзлар уларнинг шаъни ва қадр-қиммати учун ҳақорат эканини айтишган эди.
43 ёшли Ербол Есхожин ўтган йилдан бери олти марта ҳибсга олинди, унга нисбатан “рухсат берилмаган йиғилишда иштирок этиш” айби қўйилди. Умумий ҳисобда у ҳибсда 85 кун ушлаб турилди. Фаол ўзига қўйилган айбловлар сиёсийлаштирилганини айтади.