Ссылки доступа

Жээнбеков: Хитой-Қирғизистон-Ўзбекистон темирйўли қурилишида иштирок этишга Россия тайёр


Хитой-Қирғизистон-Ўзбекистон темирйўл қурилиши лойиҳасида Россиянинг иштирок этиши масаласида олий даражада келишувга эришилди.

Айни дамда уч мамлакат ва Россия иштирокида 3+1 форматида фаол музокоралар олиб борилмоқда. Бу ҳақда ҚР президети Сооронбай Жээнбеков давлатга тегишли “Биринчи радио”га берган навбатдаги интервьюсида маълум қилди.

Мазкур лойиҳада Россиянинг роли ва музокораларнинг бошқа деталлари ҳақида Қирғизистон раҳбари маълумот бермади. Бироқ, у республика учун мазкур лойиҳа «ўта муҳим» эканлигини таъкидлади.

«Пандемия бошланиб, чегаралар ёпилганда биз оғир вазиятга тушиб қолдик. Биринчи ўринга нафақат иқтисод, балки одамларни озиқ-овқат ва ун билан таъминлаш масаласи чиқди. Темир йўл биз учун жуда ҳам муҳимлигига амин бўлдик. Ҳозир экспертларимиз иш олиб бормоқда. Умуман олганда Хитой томони бу лойиҳага қизиқиш билдирган», — деди Жээнбеков.

Хитой-Қирғизистон -Ўзбекистон темир йўл лойиҳа ғояси 2000 йиллар бошида илгари сурилган эди, аммо шундан бери ҳаётга татбиқ этилмай келади. 2017 йилда “Хитой-Қирғизистон-Ўзбекистон” темир йўл қурилиши бўйича уч томонлама ишчи гуруҳи тузилгани, уни ҳаётга татбиқ этишнинг учта турли вариантлари кўриб чиқилаётгани айтилган эди.

Аввалроқ, президент Сооронбай Жээнбеков баёнот бериб, Россия ҳам мазкур лойиҳанинг ҳаётга татбиқ этилишида иштирок этиши кераклигини билдирган эди. РФ ташқи ишлар вазири Сергей Лавров бу масала бўйича, жумладан Хитой билан ҳам музокоралар олиб борилаётганини тасдиқлаган эди.

2020 йил июнида «Қырғыз темир жолу» ДК давлат корхонаси баёнот бериб, бир ойдан кейин Хитой-Қирғизистон -Ўзбекистон темир йўлининг тармоғи қурила бошланишини маълум қилган эди. Бироқ, эртаси куни компания бу хабарни сайтидан олиб ташлади, ҳамда ОАВ тасдиқланмаган хабар тарқатгани борасида эълон қилди.

XS
SM
MD
LG