Ссылки доступа

Шавкат Мирзиёев БМТ ҳузурида Афғонистон бўйича қўмита тузишни таклиф қилди


Ўзбекисатон президенти Шавкат Мирзиёев Бирлашган Миллатлар Ташкилоти Бош Ассамблеясининг 75-сессиясидаги нутқида БМТ ҳузурида Афғонистон бўйича қўмита тузишни таклиф қилди. Бу ҳақда президенти матбуот хизмати хабар берди.

«Биз Афғонистонни Марказий Осиёнинг ажралмас қисми сифатида қабул қиламиз. 2018 йил март ойида ўтказилган Афғонистон бўйича олий даражадаги Тошкент конференцияси афғон муаммосини ечиш учун халқаро ҳамжамият саъй-ҳаракатларини сафарбар этишда янги босқич бўлди. Биз жорий йилнинг сентябрь ойида Доҳа шаҳрида афғон сиёсий кучлари ўртасида бошланган тинчлик музокараларини тўла қўллаб-қувватлаймиз. Бу музокаралар жафокаш афғон заминида тинчлик ва барқарорлик ўрнатишига умид қиламиз», — деди Шавкат Мирзиёев.

Шавкат Мирзиёев Бирлашган Миллатлар Ташкилоти ҳузурида афғон халқининг дарду ташвишини тинглайдиган, доимий фаолият кўрсатадиган қўмита ташкил этиш таклифини билдирди.

«Минтақада иқтисодий интеграция жараёнларига Афғонистонни кенг жалб этиш мақсадида ‘Сурхон – Пули Хумри’ электр узатиш тармоғини, Мозори Шарифдан Ҳинд океани портларига чиқадиган темир йўл қурилиши каби йирик инфратузилма лойиҳаларини амалга оширишга киришдик. Фикримизча, Афғонистонда тинчлик ва барқарорлик ўрнатиш масалалари Бирлашган Миллатлар Ташкилотининг доимий эътибор марказида бўлиб қолиши зарур.

Фақат биргаликда ва яқин ҳамкорлик орқали биз афғон халқининг эзгу орзу-умидларини рўёбга чиқаришимиз мумкин. Бу борада ‘Беқарор ва вайронкор вазиятдан – тинчлик ва бунёдкорлик сари’ деган тамойил асосида иш олиб бориш муҳимдир», дея таъкидлади президент.

Мирзиёев БМТдаги нутқида пандемия, демократик ўзгаришлар, минтақа муаммолари ва экология масалаларига ҳам тўхталди.

Ўз сўзи якунида Ўзбекистон президенти дунё бўйлаб қашшоқлик ва камбағаллик муаммолари кучайиб бораётганидан баҳс этди. Унга кўра, бу муаммолар айниқса пандемия шароитида кескин тус олмоқда.

XS
SM
MD
LG