Унинг айтишича, эрталаб Бокаев бўлган махсус вагон Макат станциясига келган, шундан сўнг бу вагон Манғишлақ – Отирау йўловчи поездига уланди.
– У билан суҳбатлашиш имкони бўлмади. Биз фақат узоқдан хайрлашдик. Энди у икки ҳафта карантинда бўлади. У Отираудаги УГ-157/9 қамоқхонасида бўлади, – деди Аян. Макс Бокаев билан учрашиш мақсадида станцияга Аян билан бирга ҳуқуқ ҳимоячилари Асел Нургазиева ва Дарья Олжагалиева ҳам келди.
46 ёшли фуқаролик жамияти фаоли Макс Бокаев 2016 йил апрелда Отирауда ер ислоҳотларига қарши бўлиб ўтган митингдан сўнг беш йил озодликдан маҳрум қилинган эди. Бокаев “ижтимоий низо қўзғаш”, “ёлғон хабар тарқатиш” ва “митинглар тўғрисидаги қонунларни бузиш”да айбланди.
Бокаевнинг жазо муддати февралда тугайди. У шартли равишда муддатдан аввал озод қилиш борасида ариза ёзишни истамади. Бокаев Оқтобе вилоятидаги колонияда жазо муддатини ўтади, бу ерга 2018 йил Шимолий Қозоғистон вилоятидаги колониядан этап қилинган эди.
Қамоқда бўлган фаол ва унинг қариндошлари Отираудаги колонияга ўтказишни сўраб бир неча бор мурожаат қилган эди, бироқ расмийлар ”бўш жой йўқлигини” айтиб бу илтимосларни рад қиларди.
У билан бирга ҳукм қилинган фаол Талгат Аян 2018 йил апрелда беш йиллик қамоқ муддатини озодликдан чеклашга алмаштирган эди. 2019 йил 29 июл куни суд Аянни озод қилди. Аян худди Макс Бокаев сингари судда ўзига қўйилган айбларни инкор қилди.
Июл ойида 12 нафар америкалик сенаторлар Қозоғистон расмийларига мурожаат қилиб ўз қарашларини тинч йўллар билан билдирган фуқароларни жазодан озод қилишга чақирган эди.
Қозоғистонда вақти вақти билан ўтказиб туриладиган норозилик акцияларида иштирокчилар Макс Бокаев оқланиши ва қамоқдан озод қилинишини талаб қилишади. Макс Бокаев ҳуқуқ ҳимоячилари томонидан сиёсий маҳбуслар рўйхатига киритилган. Қозоғистон расмийлари мамлакатда сиёсий маҳбуслар борлигини инкор қилади.