Федералдык мекемелердин маалыматына караганда, кеминде бир жолу жасалган чабуулдун жыйынтыгында хакерлер тобу сыр сөздөргө, IT-инструкцияларга, сатуу-сатып алуу тууралуу жана башка маалыматтарга ээ болушкан.
Атайын кызмат өкүлдөрүнүн билдиришинче, түйүндөрдү бузуп кирүү аракети — АКШда жүрүп жаткан президенттик шайлоо өнөктүгүнө кийлигишүүгө багытталган.
Азырынча орусиялык хакерлер добуштарды эсептөөгө түздөн түз таасир эткендиги же каттоого алынган шайлоочулардын маалыматтарын алгандыгы боюнча далилдер жок. Хакерлер компьютердик түйүндөргө кирип, бирок «андан ары эч кандай аракеттерге барышкан эмес».
Түйүндөрдү бузуп киргенден кийин хакерлер сайттардын ишин үзгүлтүккө учуратуу жана купуя маалыматтарды жарыялоо үчүн жергиликтүү компьютердик түйүндөр тууралуу маалыматтарды колдонушу мүмкүн. Өз кезегинде бул шайлоочуларда шайлоо жыйынтыктарынын ачык-айкындуулугуна байланыштуу күмөн ойлорду жаратышы ыктымал. Буга чейин президент Дональд Трамп атаандашы Жо Байден шайлоодо алдамчылык жол менен гана жеңишке жетиши мүмкүн экенин айткан.
Америкалык басылмалардын маалыматына караганда, кеп Орусиянын бийлиги колдогон Energetic Bear деген хакердик топ жөнүндө болууда.
