Демократик партия номзоди Жо Байден АҚШ президент сайловида ғолиб чиққани маълум бўлганидан бери илк маротаба чиқиш қилган Трамп ўз маъмуриятининг вакцина ишлаб чиқиш борасида эришган муваффақиятлари ҳақида сўзлаб берди.
Ҳафта бошида АҚШнинг Pfizer ва Германиянинг BioNTech ширкатлари ҳамкорликда ишлаб чиқарган вакцина синовнинг учинчи босқичида 90 фоиз натижа кўрсатгани хабар қилинган.
Яна бир АҚШ ширкати Moderna кейинги ҳафтада ўз вакцинаси самараси ҳақида эълон қилиши кутилмоқда.
Трамп Pfizer вакцинасидан фойдаланишга тез орада расмий рухсат берилишини таъкидлади.
Оқ уйнинг вакцина ишлаб чиқариш дастури етакчиси Монсеф Слауи АҚШда йил якунигача икки коронавирус вакцинаси расман маъқулланиши мумкинлигини айтди.
Унинг сўзларига кўра, кейинги ойда 20 миллион доза вакцина тиббиёт ходимлари ҳамда аҳолининг заиф қатламларига тарқатилади.