Бино ба иттилои хабарнигори бахши туркмании Радиои Озодӣ, бориши барфе, ки 25 декабр шуруъ шуда буд, рӯзи баъдӣ низ идома ёфта, баландии он ба 10 сантиметр расидааст.
Ин боришот нишон дод, ки Хадамоти коммуналӣ ва роҳҳои Туркманистон имсол низ ба зимистон омода набудааст. Дар шаҳри Ишқобод дар натиҷаи яхбандии роҳҳо автобуси мусофирбар чаппа шуда, дар вилояти Марӣ чандин садамаи нақлиётӣ рух додааст.
Ба иттилои хабарнигори бахши туркмании Радиои Озодӣ, дар Марӣ садамаҳои нақлиётӣ бо иштироки мошинҳои пулис низ кам нестанд.
Расонаҳои расмии Туркманистон дар бораи ин мушкилот чизе намегӯянд ва телевизионҳои давлатии он кишвар шоми 27 декабр сайругашти президент Қурбонгулӣ Бердимуҳаммадовро бо наберааш Каримгулӣ дар қаторкуҳҳои Копетдоғ нишон доданд.