Ссылки доступа

Янги йил куни пиротехника – паққилдоқлардан камида 120 киши жароҳатланди


31 декабрдан 1 январга ўтар кечаси турли ҳил пақилдоқлардан фойдаланган 120дан ортиқ одам куйиш жароҳатини олган.

Ички ишлар вазирлиги матбуот котиби Шохрух Ғиёсовнинг 3 январь куни маълум қилишича, жароҳат олганларнинг 80 фоизи вояга етмаган болалардир. Шунингдек, пиротехника воситаларидан фойдаланиш оқибатида 6 та уйда ёнғин содир бўлган.

Матбуот котиби Янги Йил арафасида Ўзбекистонда 12 миллиондан кўпроқ пиротехника маҳсулотлари мусодара қилингани, 258 киши маъмурий ва 17 киши жиноий жавобгарликка тортилгани ҳақида билдирган. 1048 та факт бўйича ҳужжатлар суд ва бошқа органларга қонуний чоралар кўриш учун юборилган.

Ўзбекистонда 2010 йилнинг 22 сентябрида қабул қилинган қонунга асосан пиротехника воситаларини ноқонуний ишлаб чиқариш, тайёрлаш, сақлаш, ташиш, жўнатиш, ишлатиш, шунингдек, ноқонуний олиб кириш, экспорт қилиш ёки сотишга нисбатан маъмурий ва жиноий жавобгарлик жорий этилган.

Ички ишлар вазирлигининг билдиришича, Янги Йил мавсумида пиротехника воситаларининг ноқонуний айланмасига қарши курашиш, рейдлар ва профилактик тадбирлар ўтказиш мақсадида ички ишлар, Миллий гвардия, солиқ ва бошқа органлар, шунингдек, жамоатчилик аъзоларидан иборат 800 дан ортиқ махсус гуруҳлар шакллантирилган.

XS
SM
MD
LG