Ссылки доступа

Коронавирус тарқалиши сабаб Англияда карантин қайта жорий қилинди


Буюк Британия бош вазири Борис Жонсон душанба куни кечқурун сўнгги ҳафталарда коронавирус билан касалланганлар сонининг кескин кўпайиши муносабати билан Англияда бутун мамлакат бўйлаб карантин жорий қилинганлигини эълон қилди.

Аҳолига фақат керак бўлганда ўз уйларидан чиқиш тавсия этилади, аксарият дўконлар ва хизмат кўрсатиш корхоналари ёпилади, мактаблар масофадан ўқитишга ўтади.

Бу COVID-19 билан боғлиқ учинчи карантин чоралари — биринчиси мартда, иккинчиси ноябрда жорий этилди. Декабрь ойи бошида, вазият барқарорлашгандан сўнг, карантин бекор қилинди, аммо Лондон ва Англиянинг жануби-шарқида ой охирига келиб, юқтирганлар сони кескин кўпая бошлади. Бунинг асосий сабаби янги турдаги коронавируснинг тарқалиши бўлди. Мутахассисларнинг тахминларига кўра, бу «одатдаги» штаммга қараганда 50 дан 70 фоизга кўпроқ юқумли ҳисобланади.

Лондонда ва унинг атрофидаги ҳудудларда жиддий чекловлар жорий этилди, аммо бу вируснинг тарқалишини секинлаштиришга ёрдам бермади, шунинг учун ҳукумат янги карантин жорий қилишга қарор қилди — у февраль ойининг ўрталарига қадар давом этиши кутилмоқда. Шотландиянинг автоном ҳокимияти ўз ҳудудида карантинни аввалроқ жорий қилган эди.

Буюк Британияда ўтган ойдан катта эмлаш кампанияси бошланган. Вакцинани аллақачон мамлакатнинг миллионга яқин аҳолиси олган. Бош вазирнинг сўзларига кўра, февраль ойининг ўрталарига келиб, хавфли гуруҳ вакилларининг аксарияти эмланади, шундан сўнг чекловларни юмшатиш мумкин бўлади.

4 январь куни Буюк Британияда AstraZenesa ва Оксфорд университети олимлари томонидан ишлаб чиқарилган дори билан коронавирусга қарши оммавий эмлаш бошланди. Бундан ташқари, Пфизер корпорациясининг дори воситаси билан эмлаш ҳам мавжуд.

Пандемия бошланганидан бери деярли бир йил ичида Буюк Британияда 2,5 миллиондан ортиқ одам коронавирус билан касалланган (Бош вазир Борис Жонсон ҳам вирусни юқтириб даволанган). 75 мингдан ортиғи вафот этди. Сўнгги кунларда ҳар куни 50 мингдан ортиқ янги юқумли касалликлар аниқланди — бу энг юқори кўрсаткичлардир.

XS
SM
MD
LG