Ссылки доступа

Етти давлатга нисбатан аввал жорий қилинган авиақатнов чеклови муддати узайтирилди


Ўзбекистонда Буюк Британия, Италия, Дания, Австрия, Австралия, Нидерландия ва Жанубий Африка Республикаси билан халқаро авиақатнов (кириш, чиқиш ва транзит рейслар орқали республикага кириш) учун қўйилган чеклов муддати шу йил 1 февралигача узайтирилди.

Аввалроқ Республика махсус комиссияси “дунёдаги эпидемиологик вазиятнинг тезкор кескинлашуви шароитида Ўзбекистондаги эпидемиологик барқарорликни сақлаб қолиш, коронавирус инфекцияси тарқалишининг янги ўчоқлари пайдо бўлишига йўл қўймаслик мақсадида” коронавируснинг янги штамми тарқалаётган саккиз давлат билан 2020 йил 21 декабридан 2021 йилнинг 10 январига қадар ўзаро парвозларга чеклов жорий қилганди.

Махсус комиссиянинг чеклов муддатини узайтиришга оид янги қарорида рўйхатдан Германия олиб ташланган, натижада унда номлари юқорида зикр этилган 7 та давлат қолган.

Қарор билан бу етти давлатда сўнгги 14 кун давомида бўлган учинчи давлат фуқаролари юқоридаги чеклов амал қилган давр мобайнида Ўзбекистонга киритилмаслиги белгиланган.

Қайд этилишича, сўнгги икки ҳафта мобайнида Буюк Британия, Италия, Дания, Австрия, Австралия, Нидерландия ва Жанубий Африка Республикаси давлатларида бўлган ҳолда учинчи давлатлар орқали Ўзбекистонга кириб келаётган ўзбекистонликлар ва фуқаролиги бўлмаган шахсларнинг ҳам 14 кун давомида вақтинчалик карантинда сақлаш мажмуасида ёки тегишли меҳмонхонада карантинга олиниши тартиби давом эттирилади.

Мазкур чекловлар ушбу давлатлардаги эпидемиологик вазият барқарорлашгани сари босқичма-босқич бекор қилиб борилиши айтилган.

XS
SM
MD
LG