Сот жараяны онлайн өттү.
64 жаштагы диний ишмер Абдукарим Хасан былтыр октябрда 140 000 теңге айыппулга жыгылган. Анда ал “каттоодон өтпөгөн диний бирикменин ишин жарнамалоого” күнөөлөнгөн.
– Былтыр “каттоодон өтпөгөн суфизмди үгүттөгөнүңүз үчүн айыппул төлөтөбүз” деп полицияга алып барышып, 140 миң теңгеге чек жазып беришкен. Аны төлөгөм. Эми дал ошондой жагдай менен экинчи жолу соттогону жатышат, - деди ал “Азаттыктын” казак кызматына.
Сотто диний активисттин юристтери Максим Алшынбай менен Адиль Тулкебаев ал мурда айыппул төлөгөнүн айтып, ишти токтотууну талап кылышты.
Абдукарим Хасандын айтымында, ал мурда да укук коргоо органдарынын кысымына кабылган. 10-январда ал аялы менен бирге парламенттик шайлоого добуш берүү үчүн баратканда, үйүнүн алдынан кармалышкан. Аларды полиция кечинде гана бошоткон.