Ссылки доступа

Парвозҳои доимӣ байни Тоҷикистону Узбекистон барқарор шудааст


Миёни Тоҷикистону Узбекистон парвозҳои доимӣ барқарор шуданд.

Икром Субҳонзода, раиси Оҷонси авиатсияи шаҳрвандии Тоҷикистон рӯзи 15-уми январ ба хабаргузории давлатии Ховар гуфтааст, ин парвозҳо ҳар ҳафта рӯзҳои чаҳоршанбе ва ҷумъа аз ҷониби ширкатҳои "Узбекистон ҳаво йуллари" ва "Сомон Эйр" анҷом мешаванд.

Вай афзудааст, ки Ситоди муқобила бо коронавирус барои барқарор шудани парвозҳо иҷозат додааст.

Ба гуфтаи Раиси Оҷонсии авиатсияи шаҳрвандии Тоҷикистон, "мусофирон бояд, ки бо худ маълумотномаи ташхиси тиббии манфии сироятшавӣ аз COVID-19 (PCR-тест)-ро, ки давоми 72 соат пеш аз парвоз гирифтаанд, дошта бошанд."

Доштани ниқоб ва дастпӯши муҳофизатӣ ҳам ба гуфтаи Икром Субҳонзода ҳатмӣ аст.

Арзиши чиптаи парвозҳои доимӣ миёни Тошканд ва Душанбе ҳанӯз расман эълон нашудааст.

Парвозҳо миёни Тоҷикистону Узбекистон бо ҳадафи пешгирӣ аз паҳншавии коронавирус аз моҳи марти соли гузашта ба ин тараф қатъ шуда буд. Танҳо рӯзи 5-уми январи имсол миёни Тоҷикистону Узбекистон як парвози чартерӣ анҷом шуда буд.

Тибқи қарори мақомоти Узбекистон, шаҳрвандоне, ки марзи ин кишварро убур мекунанд, бояд аз санҷиш гузаранд ва он аз ҳисоби худи мусофир анҷом дода мешавад.

XS
SM
MD
LG