Оның сөзінше, АҚШ санкциясы еліне орасан экономикалық шығын әкелді. "Егер санкция болмағанда, иран халқы мұндай қиын жағдайда қалмаушы еді", - деді Джахангири.
Иран парламенті желтоқсан айында қабылдаған заңға сәйкес, егер АҚШ 21 ақпанға дейін санкцияларды жеңілдетпесе Иран үкіметі ядролық ұстанымын қатайтуы қажет.
АҚШ-тың 45-президенті Дональд Трамп 2018 жылы Иранның алпауыт елдермен жасасқан ядролық келісімінен шығып кетіп, Тегеранға қарсы санкцияларды қалпына келтіре бастаған.
Жауап ретінде Тегеран келісімнің кей шарттарын орындаудан бас тартатынын мәлімдеді. Өткен айда Иран уранды 20 пайызға дейін байытуға көшті.
Келісім аясында Иран уранды бар-жоғы 4 пайызға дейін байытуға міндеттенген, ал оның өтемі ретінде оған қарсы санкциялар жеңілдетілуі тиіс болған.
Байыту деңгейін 20 пайыздан асырса, оны ядролық қару жасауға пайдалануға болады.
АҚШ-тың жаңа президенті Джо Байденнің әкімшілігі келісімге оралудың жолдарын қарастырып жатыр. Байден осы жөнінде мәлімдеме жасап, егер Тегеран келісім шарттарын орындауға көшсе, АҚШ-та өз міндеттерін қарастыра бастайтынын айтты. Бірақ Тегеран алдымен Вашингтон санкцияларды жеңілдетуі тиіс және Иранның зымыран бағдарламаларын шектейтін бастамаларын бас тартуы қажет деді.